“Oropa,
germape-golape, k̆oçepeşi şiirepe opşa mç̆arum!”
(Goʒ̆otkvala: Andğaneri musafiri çkimi ren Ridvan
Ozkurt Anç̆aşi. Ridvan Ozkurt Anç̆aşi ren dobadona çkinişi Lazi
gamantanerepeşen; sp̆ort̆meni, mafut̆bole, şairi, “Omjore” coxoni k̆ult̆uruli
şkaguri- k̆afeşi mance, mskva cumak̆oçi. Ridvan Ozkurt Anç̆aşi k̆ala biyografi
muşişen; skidala muşişen, p̆rofesiuli sp̆ort̆uli skidalaşen, şiirepe muşişen do
k̆ult̆uruli noçalişepe muşişen bğarğalit. 04 II 2022/ Ali İhsan Aksamazi)
+
Ali İhsan Aksamazi: Tkvanti ginonanna,
ipti ti-tkvanişen molamişinit, mu iqven! Sonuri ret? So yeçkindit, so
dibadit? Gvari tkvani ren Anç̆aşi. Mu tkvala ren Anç̆a? Solen,
mundes yeçkinderen aya gvari? Namu nʒ̆opulapes so do mundes igurit? Çileri
reti? Berepe giqonunani? Namu nenape giçkinan?
Ridvan Ozkurt Anç̆aşi: Rize do Vija na
nunʒ̆xun Ğvandi dovirini. Anç̆aşi soyadi şkimi varon, elaçama’n. Soyadi şkimi
Ozkurti on. Anç̆a ar k̆inçişi yoxo oren. P̆ap̆u şkimi askerişa idusi, va
gvaktu, Sarik̆amişi şehidi diyu. P̆ri askerluğişa idu, Bena şkimi
korba dvaudort̆u. K̆oçi muşi ğurusi, baba muşişi oxoris dvorini bere muşi,
Mek̆aleskiriti çoi.
Bena şkimişi babapeşi elaçama Anç̆a uʒ̆omert̆ey,
himdora şuk̆ule şkuti him elaçama kocemadvey. Baba şkimi imordusi, Ğvandişa
niyonu şk̆ule, Mek̆aleskiritişa na niyonuşeni, Anç̆aşi miʒ̆omeran him oraşa
berile. Ar ma xvala arti elaçamapeti kocemodvey. Fut̆boli navibirt̆i şeni, “Laz
10”, “Maradona” do “Şairi” deyiteti miʒ̆omeran. İlkokuli çoi şkimi, orta do
lise Vijaşa vidi. Liseşa vit̆işani dido vorsi na t̆opi mabiret̆u şeni do ar do
cençareri na vamiğurt̆ey şeni fut̆boli k̆ale govikti, futbolci viyare deite him
orape k̆arari komepçi. Çileri vore. Cur biç̆i bere komiyonun. P̆olis, Kadikoyis
pskudur. Lazuri do Turkuri komişkun.
Ali İhsan Aksamazi: Beroba tkvanişen,
oput̆eşi skidalaşen molamişinit, mu iqven! Muç̆o rt̆u skidala emindros? Beroba
tkvanişi gonoşinepeşenti molamişinit! Edo oput̆es skidala muç̆o rt̆u do aʒ̆i
muç̆o ren?
Ridvan Ozkurt Anç̆aşi: Cureneçi do vit
ʒ̆ana na golovali ar k̆oçi vore, aşkva himuşeni ham orape do him orape
elevudvasi, him orape dido k̆aoba vort̆i mişkun. Beronaşi orape şkimi şeni,
zade xeleri do k̆aoba golaxtu orape. Baba şkimiti dido xe momçey k̆aoba oskudu
şeni. Ortaokuli evonç̆inişa, Bena şkimişk̆ala vort̆i dido orape. Şku dulyape
payeri miğurt̆ey. Bena şkimi oxorişi dulyape, ma galeni. Gola, pucepeşi mç̆eşi
ma vikumt̆i. Bazi elevupinamt̆i, vimtert̆i do t̆opi obiruşa mendevit̆i. Bena
şkimi mignamt̆u pucepe variʒxani. Gola andğa na mağodupeşi heçaye dovipayat:
Andğa Uzun Çayiluği k̆ale mendevuçvi, K̆açk̆ar Dağişi
tudendopeşa. Ma radyona şkimi vişkir, pucepe mcumt̆ey. Na mcumt̆ey pucepe p̆ri
dolumcu yema celalapuri oxori k̆ale omt̆inu kocoç̆ey. Hişo varikumt̆ey, muşeni
hişo ikuman vavogni dort̆u. K̆açk̆ar Daği apiçoraşa p̆ulape kogvak̆oru, xava
vorsi na ort̆u oğurğulu kocoç̆u. Emogi ar do ğurğulu çi, ma K̆açk̆ar Daği
moyixuma domaʒ̆onu, keʒ̆emaxapinu vimt̆i. Pucepe şkimda ordo imt̆ey. Him ora
vogni çi, pucepe furt̆ona na moxtasen ognaman, heşeni ordoşa oxori k̆ale
izdert̆ey, Bena şkimi domoguru. Ğurğulu do eʒ̆emak̆apinusi, radyona şkimi
cemilu dort̆u. Radiyona şkimi iritulli şkimort̆u, “Arkasi Yarin”, futbolişi
maçepe, turkepe. Him varort̆uk̆o muç̆ote oxovaktart̆u, himute oxovaktert̆i.
T̆obaşk̆alaşa koceftidort̆u, hekole govikti. P̆ula kamaxtu muç̆o bžirart̆u çi,
cemilusi radiyona gonʒ̆umerort̆u. tamlinapeşi oşkenda “Neşet Ertaşişa na
işkinit turki diçodu ya do huy “Hafta Soni” p̆rogrami” ek̆eviçaten ya deyi
isnapamt̆u çi, nena mevaşkini muç̆o xe şkimite dobdvi steri ep̆ç̆opi
do xeleri do k̆aobate oxorişa vigzali. Oçi Neşet Ertaşi govişinit, so doloncay
torp̆i to eyankt̆ay. Ogineri çoi do huy dido cinkturu. Ogine kartikarti
nuşvert̆ey, ʒ̆ulupe didepe dujert̆ey. Çoi didi- ʒ̆ulu Lazuri isinapamt̆ey. Huy
hişo varon irituli cinkturu. Miti ğururt̆ik̆o xe mele varikuy, Orf- adeti,
k̆ult̆uri kort̆u. Didepe muti tkvanen him iyert̆u. Huy aşkva tersi k̆ale
cinkturu. Cureneçi ʒ̆ana na golvaleype kuşkuran, mitişi corumci na varon şkit
devletişi ar taneti şku vort̆it dei domoguramt̆ey muelimepe ilkokuli. Him orape
bergumt̆it, pxaşkumt̆it, çoi xampaluği iyert̆u. İrituli komiğurt̆ey. Ar mcumu,
gazyaği, şeçeri do dolokunaşe şeni noğaşa cilinert̆u. Huy irituli mevaşkvit do
noğaşa ep̆ç̆opumt.
Ali İhsan Aksamazi: Tkvan p̆rofesionali
mafut̆bole ret. İpti mundes geoç̆k̆it fut̆bolişi skidalas. Mundes p̆rofesionali
mafut̆bole iqvit? Namu ligepes fut̆boli isterit? Namu fut̆bolişi gundepes
isterit? Didopeten namu p̆ozisyonepes fut̆boli isterit eya fut̆bolişi gundepes?
Ridvan Ozkurt Anç̆aşi: Emogi Vija, Çamlıhemşin
sp̆orişa lisansi şkimi gamaxtu. Him oraşi belediye başk̆ani Galip Pelit
Çamlıhemşin sp̆orişiti başk̆ani ort̆u.1986 ʒ̆anas Rize sp̆orişi genç t̆akimişa
miyoxesi, emogindeneri p̆rofosyonel k̆ulubi k̆uçxe kamoviği. Şkuni ora ma-1,
ma-2 amat̆ori do ma-1 ligi, ma-2 ligi, ma-3 ligi ort̆u Ma Ardeşen
sp̆ori amat̆ori ort̆uşaniti dovibiri, p̆rofosyoneli ort̆uşaniti. Rize, Yalova,
Antalya, İst̆anbulişi p̆rofosyoneli t̆akimepe 10-11 numara formape dolovikuni.
Ma fut̆boli vibirt̆işani “Laz 10” elaçama muç̆o cemadu; him dovipayat: Ma na
vibirt̆i t̆akimi şamp̆iyonluğişa ibirt̆u, rakibi şkuni kume mocevolamt̆a dei
histeri maçepe irituli iyen. Rakibi şkimişi fut̆bolci k̆urali navaronti
golomiguturt̆u, navamiʒ̆oney muti vadoskudu dort̆u. Hakole va gamogalanen, hay maçi
eç̆opat do va gagzalinanen, ğureri gamolva xazi vagayenna, vorsi varibira goli
vamit̆oçaten steri, iritulişi. Ar k̆ale do kusişi cemçay. Ar kusi cemçusi,
cevoli, k̆uçxe memotroxu mişk̆urt̆u Lazuri kok̆ovudvi fut̆bolciti,
hakemiti .
Hey goyomoret̆u hakemiti, si muperi isinapam ma muti
vavogniya nam nenate isinapamya, mutxa mogorit mondoya; Mati vuʒ̆vi çi; Si
muperi hakemi ore, k̆oçi domʒ̆amu, k̆uçxe memot̆axasen, kusi cemçay vagazini?
Moy mçit̆a kart̆i vameçam ma dei guri momalu ma vuʒ̆vi. İrituli vamažitu mati
mçit̆a kart̆i komomçasen dei hakemi. Devre- arasi iyusi, a xoloti dovisinapi,
Lazuri mevazmoni muç̆o ar nena’nya. Ok̆açxe ar oyini daha him hakemi moxvadu ar
maçi; ma do mçveşi ark̆adaşi sahaşi doloxe k̆ale vit̆it; Şku miyoxey do
vadomagurey, dido k̆oçepeşi nenate tezahuretepete. Himdoy uyoxi 10 numara çi,
arti bereti 10 numara dolvonkurt̆u mati. Nam 10 numara vuyoxat uʒ̆vesi, “Laz
10” uyoxit ya hakemi. Hişote “Laz 10” elaçama kocemadu.
Ali İhsan Aksamazi: Gamiçkvineri dido
mskva Lazuri şiirepe kogiğunan. Gamiçkvineri dido mskva Turkuli şiirepe
kogiğunan. Gamiçkvineri sum şiiriş ketabi kogiğunan. Ma eşo miçkin: “Çona”/
“Işık”, “Mendra/ Uzak” do “Gurişi Vadi”/ Gonul Vadisi”. Gamiçkvineri vana
nagamiçkvinasunon majura ketabepeti giğunani? Didopeten namu temapeşen ç̆arupt
şiirepe tkvani?
Ridvan Ozkurt Anç̆aşi: Hişo: “Çona”,
“Mendra”, “Gonul Vadisi” ,”Çam Kokulu Sevdalar”, “Guneşin Uşuduğu Yer”. “Çona”
do “Mendra” Lazuri şiirepe’n. “Gönül Vadisi” do “Çam Kokulu Sevdalar” Turkuri
Şiirepe’n. “Guneşin Uşuduğu Yer”, Turkuri romani; Fort̆una Vadi, K̆açk̆arepe
oreperepeşi heçayeşi romani oren. Hani huyşa nagamxtu çitabepe. Na
voyondrinapam, na gamaxtasen çitabepeti koran. Ar tane Lazuri romani, ar tane
Lazuri heçaye, ar taneti xolo Lazuri şiiri. Ar do Turkuri şiiri
çitabepe p̆andemi do memleketi mʒika ont̆aleri naon şeni irituli viyondram, va
gamoviğam. Ora muşi moxtasi, cevobažgaten, gamoviğaten, hişo vimedam. Ma
p̆olit̆ik̆aşa gale muti hiçayeşi şiirepe mç̆arum. Oropaşi şiirepe opşa mç̆arum.
K̆oçepeşi, germapeşi, golapeşi, oginerepeşi. Na it̆rağudenşi şiirepe dido
mç̆ari. Muzisyeni- sanatçepe na t̆rağuduti kon, ot̆rağudoni şiirepe dido on do
huyneri muzisyenepe bestekari varuyonuran. P̆oli celaxuneri turki do şarki var
izit̆t̆en, var ixeninen. Muç̆o izit̆t̆en, oginerepe na nç̆areype, na
t̆rağudeype, anonimi na cozun, turkepe, şarkepe, ozit̆ute ham orape goluçuman.
Ar t̆elevizyonişi p̆rogrami Turk-xalk̆ muziğişi sanatçi şk̆ala beraberi
vort̆it. Moderat̆ori uʒ̆u çi himu, Ridvanişi ham şiiri moy turki varikum do var
t̆rağudamya çi, sanatçi cevabi meçu, telif hakki vamemaçeran, anonimi bedava
kon do him muşeni cencareri mepçatya. Ham orape haşo golun, mup̆at. Xanpaluği
konoxvey.
Ali İhsan Aksamazi: “Ağani Muruʒxi”/
“Yeni Yildiz” coxoni Lazuri gazetaşi sp̆ort̆uli redakt̆ori ret, eşo miçkin. Sp̆ort̆uli
mak̆alepe ç̆arupt. Didopeten namu temapeşen sp̆ort̆uli mak̆alepe ç̆arupt?
Ridvan Ozkurt Anç̆aşi: Didope fut̆boli
xazayeran, himuşeni mati zati en vorsi himuşi mişkun. Fut̆boli şkuni ham orape
dido it̆ancyaru. Sok̆ale vognam maçepe içodasi, idarecepe t̆akimepeşi ulijepeşi
osinapuşa. Avrup̆a-fut̆bolişi sahaşi doloxe ibirinenya it̆uran, e him şku mu
vognamt hako sahaşi galendope na ikten meşk̆ağeri- moşk̆ağeri dulyape dei
vognamt. İri ora bet̆e t̆ancyari dulyape iyen, şkuni orati iyert̆u fut̆bolcişa
k̆omisyoni na eç̆opumt̆ey, vorsi na abiren k̆ulube xert̆aşani arti na
obiramt̆ey do ham orape iddia do k̆avuli dido na on şeni gamağuru. Mati bet̆e
mskva do vorsinobaşi onç̆aru vimedan fut̆bolişeni do mskva dulyaşa p̆iati dulyape
dido iyen memleketi şkunişi fut̆boli. Şkuti na iyenpe
mç̆arumt, mup̆at! Fut̆bolişi ptkvati Armando Diego Maradona va
govişnat do va golomalen. Let̆a dido to ayay, Alla nuşvelay heko. Maradona
p̆ot̆e va gomoç̆ondrun himuşeni dido mç̆ari.
Ali İhsan Aksamazi: “Omjore” coxoni k̆ult̆uruli
şkaguri- k̆afeşi mance ret. Çkimi toliten, “Omjore” xvala k̆afe va
ren, “Omjore” ren k̆ult̆uruli şkaguriti. Muşeni eşo
vizmon?! “Omjore”-s xvala muxlama, termoni, papa, Lazuri bureği
steri otant̆uri Lazuri oç̆k̆omalepe va iç̆k̆omen, xvala çai, gazozi va
işven. “Omjore”-s Lazuri ketabepete gamiçinen. Lazuri musik̆ati
isiminen. Otant̆uri dolokonepe steri Lazuri objepe, suretepeti nirçinen. K̆arta
ndğas gonʒ̆k̆imeri ren “Omjore”, eşo miçkin. Dolonis içalişept
tkvan. Emuşeniti xvala k̆afe va ren “Omjore”, k̆ult̆uruli şkaguri, ma aşo
komiçkin. Aʒ̆iti aya dukyani tkvanişen molamişinit, mu iqven! Muç̆o do mundes
yeçkindu “Omjore”? P̆andemişi, k̆oronavirusişi ndğalepesti ʒ̆oxleneri
steri dulya ikipti?
Ridvan Ozkurt Anç̆aşi: Liseşa vit̆işani
şiiri onç̆aru ek̆eviç̆i. Him oraşa berile yayinevi çitabi şiiri dido
xazimayert̆u. Guri kogovindvi dort̆u. Guri na dovindvi eçi do vit̆o xut ʒ̆aneri
viyisi, P̆oli- Kadikoyi gomʒ̆i. Ma p̆anda k̆alabaluği msvalepe cegaperi vort̆i,
fut̆boli, esnafluği. Xark̆i k̆oçepeşk̆ala doxunu, osinapu, oçinu p̆anda
mominay. Ma so dovirini msva zori msvalepert̆u, ma zorişa p̆ot̆e va vimt̆i.
Fut̆boli vibirt̆işani kusişi momatasi, ceri vadobguturt̆i. “Omjore Kitap Cafe
“-ti zori k̆oçepeti bet̆e nit̆ey do ma cegapumeri vort̆i. Şkuni cafeşa iri
k̆oçi nulurt̆u do universit̆eşa nauluranpe dido nit̆ey. Şku Lazuri k̆ult̆urişi
na nozmoran na varuşkuran, muti na doguru dvaç̆iran mevuşvert̆it. İrfan Çağatay
Aleksiva, araştirmaci-yazari, cuma şkimiti dido memişvert̆u. Ham orape p̆andemi
do memleketişi xali movixesap̆isi, oyondrinu mominu. Amʒika iritulli diduzanay
do xoloti gomʒ̆are dei vimedam. Ar k̆aleti dobadona şkimi Furt̆ona Vadisi
bungalow oxorepe voxenapam ʒ̆o yazi heko gomʒ̆aten. Şkuni hininepe
t̆urizimişeni vorso’n. İrik̆alendo k̆oçepe uluran. Yazi şkuni hininepe bungalow
t̆urizmi-ticareti, k̆işiti Kadikoyi. Vorsinoba vimedare do viondrare.
Ali İhsan Aksamazi: Mʒudişi oxarcuşi ar
dek̆ik̆eti va giğunan, aya k̆aixeşa komiçkin. Mara xoloti k̆itxalepes mskvaşa
nena gemiktirit. Aya rep̆ort̆aji şeni tkvan gurişen şukuri goğodapt ma. Çkva k̆itxala
va miğun tkvanda. Mara tkvan otkvaluşi çkva nenape giğunanna, entepe miʒ̆vit mu
iqven! Bere- bari k̆ala p̆anda ixelit! Pimpili dixaşa!
Rıdvan Özkurt Anç̆aşi: K̆ult̆uri
muşişeni, nena mo goyk̆aibert̆ay dei na inç̆elen ar mxeşa k̆oçi voret! Ulije na
vit̆urt k̆oçepeti ar hişo ar haşo zdani, dido guri memaç̆ven, k̆ult̆uri, orfi
do adetepe şkuni şeni. Guri xvala va memaç̆ven, guriti momale meleşi- moleşi
nazdamanpeşa. Xela do k̆aobate. Guri k̆aite, Ali İhsan xoca şkimi.
https://sonhaber.ch/ridvan-ozkurt-anc%cc%86asi-cogunlukla-ask-doga-insana-iliskin-siirler-yaziyorum/