“Nananena
gomindunes na, tamo-
tamo minoba çkiniti gondunasen!”
(Goʒ̆otkvala:
Andğaneri musafiri çkimi Natia Poniava ren. Giçkinani, va giçkinani, va
maçkinen; aya ren majurani int̆erviu çkimi Natia Poniava k̆ala. Eşo ptkvat na,
aşo ptkvat na, jur ʒ̆anaş ʒ̆oxleti muşi k̆ala ar int̆erviu dop̆eret̆i do
“Margaluri Dovigurat” coxoni ketabi muşi, biyografi muşi do noçalişepe muşişen
bğarğaleret̆it. Aʒ̆iti “Lazuri Dovigurat” coxoni ketabi muşişen bğarğalit. Aya
ren int̆erviu çkinişi t̆ekst̆i. Ali İhsan Aksamazi)
+
Ali
İhsan Aksamazi: Natia Xanum, xeladok̆aobaten. Ğormotik
iro goxelan, çkineburi nenapeşi modernuli gagnapaten oskedinu şeni içalişept do
emuşeni. Eşo ptkvat na, aşo ptkvat na, jur ʒ̆anaş ʒ̆oxleti bğarğaleret̆it;
“Margaluri Dovigurat” coxoni ketabi tkvanişen bğarğaleret̆it. Biyografi
tkvanişen bğarğaleret̆it. K̆ult̆uruli noçalişepe tkvanişen bğarğaleret̆it. Eşo
komşuns aʒ̆i. Aʒ̆i ma minon, ağani
noçalişe tkvanişen bğarğalat, iqveni?! Ağani noçalişe tkvani ren “Lazuri
Dovigurat”. ʒ̆oxleni int̆erviu çkinişen kodovigureret̆i aya. Uk̆ule
“facebook”-işen eşo kobžiri, kovogni. Amʒika aya noçalişe tkvanişen bğarğalat! Ağani noçalişe tkvanişen
molamişinit, mu iqven! Muk̆o gverdoni ren ağani
noçalişe tkvani? Muk̆o Lazuri dersi gežin ağani ketabi tkvanis? İri dersis
muk̆o noʒ̆ile gežin? Namu noʒ̆ilepek ʒ̆opxupan iri dersi?
Natia
Poniava: Xeladok̆aobaten, Ali Begi! Tkvati nena çkinişeni mskva resursepe na ikumt do
gomirtamtşeni Ğormotik
goxelan! Na
tkvitsteri, ağani noçalişe çkimi ren “Lazuri Dovigurat”, Okorturas gamaxtasen do Kortuli nena na uçkinanpeşeni iç̆aru. Turkonas çkvadoçkva sup̆arape koren Lazuri doguruşeni, ama Okorturas hakşakis amk̆ata sup̆ara va miğut̆es. Sup̆ara çkimi 270 gverdoni ren. Ha sup̆ara “Margaluri Dovigurat“ sup̆ara çkimişi k̆onsept̆iten ixenu do
30 dersi gežin. İri dersis grameri do temat̆uri zit̆apeşi noʒ̆ile
uğun. Gramerişi noʒ̆iles p̆rakt̆iğiti koren, temat̆uri
zit̆apeşi noʒ̆iles zit̆apeşk̆ule ha zit̆apeten ç̆areli dialogi vana t̆ekst̆i
naqonen. Maxutani
dersişk̆ule iri dersis p̆ap̆upeşi zit̆ape do notkvamepe, mavitani dersişk̆uleti
leksepe miğunan. Sup̆aras, doloxe muşi na ixmaru, zit̆apeşi
nenapuna numʒxun, Lazur-
Kortuli do Kortul-
Lazuriti.
Ali
ihsan Aksamazi: “Lazuri Dovigurat” coxoni ketabi
tkvanişi audiyo versiyoniti iqvaseni?
Natia
Poniava: Ko, “Lazuri Dovigurat“ sup̆ara çkimişi audiyo versiyoniti iqvasen. Medi miğunan, sup̆arak̆ala hamuti gamaxtasen, mutu
p̆roblemi maqves do va maç̆işines na, amʒika oraşk̆ule p̆aten.
Ali
İhsan Aksamazi: Mundes
gamaxtasen “Lazuri Dovigurat”? Mundes vognaten aya pukironi ambai?
Natia
Poniava: Tutamk̆uleşi geç̆k̆apaşk̆ule pçumer, ama gamamçkumale oxoris dido dulya uğut̆es do
akşakis va gamaçkvines. Ha ʒ̆anaşi ʒ̆ilva vana Xrist̆anas gamaxtasenya, miʒ̆umernan.
Ali
İhsan Aksamazi: Natia Xanum, tkvanti ginonanna,
int̆erviu çkini aʒ̆i voçodinat. Tkvan otkuşi çkva mutu giğunanna, mu iqven, eti
miʒ̆vit! Ğormotik iro goxelan! Nʒaşa extit!
Natia
Poniava: İnt̆erviuşeni didi mardi giʒ̆umert! Lazepeşa otkuşi irote miğun: Lazepe çkimi dido maoropen. Çki artik̆artişi çkva k̆ai oçinu mik̆oreman,
artik̆artişeni dido mutu va miçkinan, dido Lazis, Mergeluri muperi ar nena ren, çkar va ugnapun,
haşo ren dido Mergeliti
− Lazuri va ugnapun. Nena çkini Okorturasti, Turkonasti
gondinuşi
gzas ren, çki dalepe do cumalepe voret do artik̆artis mxuci mepçaten. Nananena gomindunes na, tamo-tamo minoba çkiniti
gondunasen, edo, heya voskedinaten. Hamuti miçkit̆an-ki, nananena çkinis çki va voʒ̆k̆edaten
na, mitik va oʒ̆k̆edasen. Skidas nananena do cumaloba çkini! Guri k̆aiten vižirat!
https://aliihsanaksamaz.blogspot.com/2023/11/anadilimiz-kaybolursa-kimligimiz-de.html