Margaluri Gamaçkvape Apxazetis

Apxazetişi Palanç̆inalak Margaluri nenasti numxvacups do “Gali” coxoni gazeta Margaluroti gamiçkvinen rayoni Samurzaqanos /Galis. “Gali” coxoni aya gazeta gamiçkvinen 1000 t̆irajiten 1995 ʒ̆anaşen doni do redakt̆ori muşi ren Nugzar Salakaya.

+

Margaluri Gamaçkvape Apxazetis:

Giçkinan, Margalepe renan çkineburi xalk̆epeşi art- arti. Edo xolo giçkinan, Margaluri nena ren çkineburi nenapaşi art- arti. Mtini giʒ̆vat na, Margaluri nena ren Margalepeşi nana nena. Margalepek Rusiaşi Federasioni, Apxazeti do Okortues skidunan. Didopetenti Apxazeti do Okortues skidunan entepek. Onç̆eloni ren, andğaneri ndğas, Margalepes Margaluri nenaten gazeta, radio, t̆elevizia, nʒ̆opula, ketabepe va uğunan Okortues. Mara Okortues vardo Apxazetis, Margalepes gazeta do ağani gamiçkvineri jur ketabi kuğunan. Aʒ̆i Apxazetis gamiçkvineri aya gazeta do jur ketabişen ambari mekçat, ma eya minon. Aya gazetaşi coxo ren “Gali”. Gazeta, sum nenaten gamiçkvinen: Rusuli, Apxazuri do Margaluri. “Gali” coxoni aya gazeta Vit̆o nçxoro oş do otxo neçi do vit̆o xut (1995) ʒ̆anaşen doni gamiçkvinen. Gazetaşi t̆iraji ren vit̆oş (1000). “Gali” coxoni gazetaşi direkt̆ori ren Nugzar Salaqaya. Aʒ̆iti Apxazetis gamiçkvineri ketabipeşen ambari mekçat: İlkinerişi coxo ren “Rusuli- Margaluri oğarğale”şi ketabi. Majuranişi coxo ren “Çkini Nena”. Aya ren dersişi ketabi. “Rusuli- Margaluri oğarğale” coxoni ketabi gamiçkvineri ren jur vitoş do vit̆o jur (2012) ʒ̆anas. “Çkini Nena” coxoni ketabi gamiçkvineri ren jur vitoş do vit̆o sum (2013) ʒ̆anas. İlkineri ketabişi Margaluri noç̆arepe hemi Kortuli alboniten hemiti Rusuli alboniten niçinen. “Çkini Nena”şi noç̆arepe Kortuli alboniten niçinen. “Rusuli- Margaluri oğarğale” coxoni ketabi ren sum neçi do anşi (66) but̆k̆oni. Ketabişi t̆iraji ren vit̆oş (1000). Ketabişi coğap̆inameçaps direkt̆ori ren Nugzar Salaqaya. Oğarğaleşi ketabişi mak̆orobepe renan V. A. 3aava do N. İ. Basaria. Osvaru do onʒ̆uranuşi dulyape ren M. M. Butbaia şk̆elen. “Çkini Nena” coxoni ketabişi maç̆are ren Nargiza Basaria. Edo ketabişi t̆iraji ren xut̆oşi (500). Redakt̆ori ren V. A. 3aava. Tek̆nik̆uri redakt̆ori ren N. N. Salaqaya. Ketabişi k̆omp̆ut’eruli onʒ̆uranuşi dulyape ren M. M. Butbaia şk̆elen. Ketabişi maxat̆e ren R. N. Şamugia. Abxazetişi Çkinobapeş Ak̆ademiaşen Ak̆ademik̆osi p̆rofesor A. K̆up̆ravasti mxuci meçeren ketabis. Ketabis Margaluri- Rusuli do İnglisuri ç̆it̆a zit̆apunati kuğun k̆ap̆ulas. Ketabi ren jur oşi do jur (202) but̆k̆oni.

(Ali İhsan Aksamazi, 2014 ʒ̆ana)

aksamaz@gmail.com