“Ak̆ademisyenepe şeniti pelaperi
ketabepe yevoçkindi!”
(Goʒ̆otkvala: Andğaneri musafiri çkimi ren Ozhan Ozturki. Ozhan Ozturki ren
dobadona çkinişi k̆ap̆et̆i Gamantanerepeşen arteri; k̆ibiriş hekimi.
Gamiçkvineri dido metimoni ketabepeti kuğun. Ma muşi k̆ala ar int̆erviu dop̆i;
biyografi do gamiçkvineri ketabepe muşişen molapşinit. Aya t̆ekst̆i ren
ok̆oğarğalu çkinişi. Ali İhsan Aksamazi; 09 III 2020)
+
Ali İhsan Aksamazi: Ozhan Begi, ʒ̆oxle
biyografi tkvanişen bğarğalat do eşo gevoç̆k̆at! So do mundes dibadit, so do
mundes yeçkindit? Namu nʒ̆opulapes igurit? Çileri reti? Berepe giqounani? Aʒ̆i
so içalişept? Namu nenape giçkinan? Dudi tkvanişen molamişinit, mu iqven!
Ozhan Ozturki: ʒ̆oxlenuro selami
giʒ̆umert! Şkvit ʒ̆ip̆aşen Uçamzoğaluri ocağişi skiri vore ma; noğa İst̆anbolis
yepçkindi do mteli gurapa- gamantanaşi skidala çkimiti artneri noğas mek̆ovolapi.
Onç̆eloni ren, yedeksubayobaşi nʒ̆opulaşi imtianepesti mağali derecepe maqu do
askerobati ak voçodini ma. ʒ̆oxle Tibburi fak̆ult̆et̆is doviguri, mara armʒika
oraşk̆ule eya fak̆ult̆et̆i mevaşkvi. Edo K̆ibiriş Hekimobaşi Fak̆ult̆et̆is
doviguri, astaxolo k̆oçi oqopimu do para mogapu mint̆u do emuşeni. (1991)
vit̆on çxoro oşi do otxo neçi do vit̆o ar ʒ̆anasti dovimezuni K̆ibiriş
Hekimobaşi Fak̆ult̆et̆işen. Anddğaneri ndğasti, para mogapu do ocaği çkimi
oskedinu şeni k̆ibiriş hekimoba vikip noğa İst̆anbolis.
Ar k̆oçis nenanena muşiti mtelo k̆aixeşa va açkinen. Aya dulyaşi anksi
otkvalu ren didi curetkyaroba. Xoş tkvanti lingvist̆i ret do aya dulyaşen
mskvaşa ambari kogiğunan. Emuşeniti ma amk̆ata curetkyarobaşa toli va miğun,
tkvanti aya aşo giçkit̆an. Ma vort̆i mamgure Brit̆anyaşi K̆onsulişi Nenaşi
K̆ursis do doviguri İnglisuri Nena ginže ʒ̆anapeş morgvalis. Emuşeti İnglisuri
Nena komiçkin, aşo matkven ma, eşo domaʒ̆onen. Eşo- aşo k̆arta
ʒ̆anas, goxtimu do goşogoru şeni ma mevulur İt̆alya do Yunanistanişa.
Emuşeniti İt̆alya do Yunanistanişi nenapeti komiçkin. Garsonepe k̆ala ç̆it̆a-
ç̆it̆a oğarğaluşen çkva dido komiçkin İt̆alyanuri do Yunanuri nenape. Beroba
çkimis nana çkimişi do mzaxelepe çkimişi oğarğalu ognuten Lazuri nenaşen,
uk̆açxeni ʒ̆anapesti armʒikati oboduten muxuri çkinişi nenapeşen, T̆amt̆raşi
Urumuri Nena steri nenapeşen dobağine ambari miğun; aşo matkven ma.
Ali İhsan Aksamazi: Tkvanti ginonan na,
aʒ̆iti ketabepe tkvanişen molapşinat! Gamiçkvineri otxo ketabi giğunan; ma eşo
komiçkin: “Kianaş Mitoloji”, “Folk̆lori do Mitolojişi Nenapuna”, “Uçamzoğaşi
Ansik̆lop̆ediuri Nenapuna” do “P̆ont̆usi (Uçamzoğaşi Etnik̆uri do P̆olit̆ik̆uri
Tarixi Ant̆ik̆uri Oraşen Andğaşa)”. “Kianaş Mitoloji” coxoni” noçalişe tkvani
mundes do namu gamaçkvaleşen gamaxteret̆u? Aya ketabi tkvaniten mu
ambarepe momçapt?
Ozhan Ozturki: Universit̆et̆is
mamgure vort̆i, emindros didopeten folk̆lori, mitoloji do mcveşi tarixi
monç̆elt̆u. Edo uçodine iştaxitenti ma irote vik̆itxupt̆i, mara emindros ketabi
oç̆aruşa çkar toli va miğut̆u.
(1990-oni) vit̆on çxoro oşi do otxo neçi do vit̆oni ʒ̆anepe rt̆u, Uçamzoğa
vinç̆eli şurdoguriten. İptineri rt̆u nena do k̆ult̆uri,
majura tarixişen ambaroni. “Uçamzoğaşi Ansik̆lop̆ediuri
Nenapuna”, aya ketabi kogamaxtu (2005) jur vit̆oşi do xut ʒ̆anas. P̆ont̆usi
coxoni ketabi çkimi gamaviği (2011) jur vit̆oşi do vit̆oar ʒ̆anas. Mcveşi
orapeşen doni folk̆lori do mitoloji vinç̆elti, aya speroşen noçalişepe
çkimiti “Folk̆lori do Mitolojişi Nenapuna” coxoten (2009 ʒ̆anas) do
“Kianaş Mitoloji” coxoten (2016 ʒ̆anas) gamaviği. “P̆ont̆usi” coxoni ketabi
çkimi ren tarixişen ambaroni. Majura sumiti ren nenapunaşi format̆is. Emuşeniti
ma didopeten leksik̆ografi mşinaps miletik. Ketabepe çkimi kogamaxtu çkvadoçkva
gamaçkvalepeşen, mara aya çkvanerobaşi sebebi ma va vore, mtelo
tesadufi ren.
Şumeruli, Xittituri, Babilonişi do Mcveşi Misiruli medeniyetepeşen Yunani,
Roma do Oçildre Avrup̆aşa; Brit̆anyaşi k̆unʒ̆ulapeşen P̆asifik̆işi
k̆unʒ̆ulapeşa; Mendrayulvaşi Xalk̆epeşen Esk̆imopeşa; Afrik̆aşen Oçildre do
Omjore Amerik̆aşa, kianaşi çkvadoçkva k̆ult̆urepeşi mitolojepen madde-madde
ambarepe komepçi do eşo yeçkindu “Kianaş Mitoloji” coxoni” ketabi çkimi. Dido
ʒ̆anape ʒ̆oxle aya kitabi çkimi p̆ç̆arupt̆i, emindros aʒ̆ineri steri ak̆o
mengaperi noçalişe va rt̆ u p̆iyasas. Çkva mtini giʒ̆vat; majura nenapeşen
Turkulişa goktireli ak̆o ketabi va rt̆ u emindros. Xoloti unoksane do
ak̆ademisyenepe şeniti pelaperi ar ketabi yoçkinduşi gzas gebdgiti ma.
Ali İhsan Aksamazi: Majura
ketabi tkvani ren “Folk̆lori do Mitolojişi Nenapuna”. Aya ketabi
tkvani mundes do namu gamaçkvaleşen gamaxtu; mu ambarepeşen molamişinapt?
Ozhan Ozturki: 2009 ʒ̆anas
“Folk̆lori do Mitolojişi Nenapuna” coxoni noçalişe çkimi gamavoçkveret̆ i
“Kianaş Mitoloji” coxoni noçalişe çkimişen şkvit ʒ̆ana ʒ̆oxle nananoğa
Ank̆aras. Edo eya noçalişe çkimik folk̆lori do dinişen ambarepe meçapt̆u. Eya
ketabişen arteriti xes va doskidu do “nadiri ketabi” yado int̆ernet̆işi
sait̆epeşen dido paxali pasiten xoloti gamiçinen. Majura ketabepe çkimi, çkva
dido referanso ixmarinu magoşogorepeşk̆elen.
Ali İhsan Aksamazi: Masumani
ketabi tkvanis coxons “Uçamzoğaşi Ansik̆lop̆ediuri Nenapuna”. Ketabi
tkvani mundes gamiçkvinu? Ketabi tkvani namu gamaçkvaleşen gamiçkvinu? Namu
ambarepe momçapt tkvan?
Ozhan Ozturki: Jur t̆omoni
“Uçamzoğaşi Ansik̆lop̆ediuri Nenapuna” rt̆u maartani ketabi çkimi. Ar çkva
gamaçkvales aya ketabi çkimi şurdogriten gamuğu unt̆u, mara ma ketabi çkimi
ağani gedgineri ar gamaçkvaleşi mances, manebra çkimis mepçeret̆i, emus
gamiçkvineri maartani ketabi iqvas yado. Uçamzoğaşi Turkulis xmareli muxuruli
t̆erimi do notkvalepeşen muxurişi t̆op̆onomepeşa hemi k̆oroberi do hemiti
et̆imolojiuri dolorena uğun eya ketabi çkimis..
Ali İhsan Aksamazi: Majura ketabi tkvani
ren P̆ont̆usi (Uçamzoğaşi Etnik̆uri do P̆olit̆ik̆uri Tarixi Ant̆ik̆uri Oraşen
Andğaşa). Aya ketabi tkvani namu gamaçkvaleşen mundes gamaxtu? Namu ambarepeşen
molaşinapt?
Ozhan Ozturki: Aya ketabi va ren
nenapunaşi formati’s, tarixişi ketabo p̆ʒ̆opxi. “P̆ont̆usi” coxoni ketabi
çkimiten xvala Turkiyeşi Uçamzoğaşi muxurişi tarixişen vardo, dudari ğarapeten
Ant̆ik̆uri orapeşen andğaneri ndğaşa K̆irimişen Bulgaristanişa, K̆afk̆asyaşen
P̆aflagonyaşa Mteli Uçamzoğaşi gomorgvaşi tarixi meçamuşi gzas gebdgiti ma.
2009 ʒ̆anas, 2011 ʒ̆anas do 2016 ʒ̆anas; sum fara gamiçkvinu aya ketabi
çkimi. Aya ketabişi 3-a k̆oroʒxas kuğun mexole 30 but̆k̆aloni ağani
ambarepe. Ağani arkeolojiuri ambarepeşenti, didopetenti K̆irimis do
muşi gomorgvas yeçkindineri ağani p̆olit̆ik̆uri xalişenti do Uçamzoğaşi enerjişi
xatepeşi p̆rojepes beciti oktirobapeşenti molapşinap aya ağani 30 but̆k̆aşi
doloxe ketabişi 3-a k̆oroʒxas.
Ali İhsan Aksamazi: Ağani noçalişeş
p̆rojepe giğunani? Pukironi ambarepe giğunani çkinda?!
Ozhan Ozturki: Eçi
ʒ̆anaşen dido oraşi morgvalis, xvala ar-jur tuta varna ar-jur ʒ̆ana oçalişuten
gverdi doskideri, didopetenti tarixişen ambaroni dido noçalişe komiğun ma.
İbadaşi, k̆oçik k̆aixeşa isimadeps do eşo ğarğalaps, eşo ç̆arups, mati eşo
vikip. Ar çkinapa ağani ren na, eya mç̆ipaşaşi osimadu-oʒ̆inuten, ʒ̆oxleşen aya
çkinapaşen molaşineri ambarepe ok̆odguten p̆ç̆arup ma. K̆artandğaleri
çkvadoçkva geʒada do mak̆alepe çkimi gebdumer https://ozhanozturk.com/ coxoni veb
sait̆i çkimis. Didopeten noğa İst̆anboli, Roma, Bizansi do Uçamzoğaşi tarixişa
nç̆ela giğunan na, vebsait̆i çkimi ik̆itxit; tavsiye goğodapt.
Ali İhsan Aksamazi: Aya ok̆oğarğalu şeni
dido şukuri giʒ̆umert. Otkvaluşi çkva nena giğunan na, eti miʒ̆vit, mu iqven!
Xçe pimpili dixaşa gegixtan!
Ozhan Ozturki: Ma şukuri giʒ̆umert!
Lazuri Nena do K̆ult̆uri oskedinu şeni didopeten tkvani do fedakyari ar-jur
manebraşi noçalişepe ginže ʒ̆anapeşen doni mineti do keyifiten vik̆itxup; ayati
otkvalu minon. Pimpili dixaşa gegixtan!
https://shangulishialiihsanaksamaz.blogspot.com/2020/04/ozhan-ozturk-konusuyor-turkce-lazca.html
http://xvalamgeri.blogspot.com/2020/04/ozhan-ozturk-konusuyor-turkce-lazca.html
