“Çkin Okorturas, tkvan
Turkiyes nena çkini voskedinat; aya maxvenenan!”
(Goʒ̆otkvala: Andğaneri musafiri çkimi ren Natia
Poniava. Natia Poniava ren Gurcistanişi lingvist̆epeşen do “Margaluri Dovigurat " coxoni ketabişi avt̆ori. Natia Poniava k̆ala ar Lazuri int̆erviu
dop̆i ma. Edo biyografi muşi do ketabi muşişen bğarğalit. 17 II 2021/ Ali İhsan Aksamazi)
+
Ali ihsan Aksamazi: Natia xanumi, ipti
biyografi tkvanişen molamişinit do eşo gevoç̆k̆at, iqveni?! Sonuri ret? So
yeçkindit? Namu nʒ̆opulapes igurit? Aʒ̆i so skidut? Mu dulya ikipt? So
içalişept? Kortuli, Megruli do Lazuri nenapeşi gale çkva namu nenape giçkinan?
Natia Poniava: Xelak̆aobaten! Ma cici Mart̆vilişen miğun, mara Çxoroʒ̆quşi ar msk̆va oput̆e Ç̆oğas dovibadi do dovirdi. Ç̆oğaşi nʒ̆opulas viguri, ek̆ule İvane Cavaxişvilişi Kartişi (Tiplisişi) Universit̆es filoloji vik̆itxi, K̆avk̆asuri
nenapeşi burme do aʒ̆iti ak dokt̆ora vikip. Oxori Ç̆oğas miğun, çkimepe aʒ̆iti ek skidunan, mara ma Kartis (Tiplisis) vore. Arnold Çikobavaşi Nenaçkinaşi Enst̆it̆ut̆es viçalişep do İliaş (İlia Ç̆avç̆avažeşi) Universit̆esti dersepe mepçap. Kartveluri nenape (majuranepek na Omjore K̆avk̆asuri nenape uʒ̆umelan) do Apxazur- Abazuri nenapeş jin
viçalişep. Nenape çkinişen çkva, İngilizuri, Turkuli, Azerbaicanuli, Apxazuri (Abazuri) do amʒika Rusuliti komiçkin.
Ali ihsan Aksamazi: Mu iqven, aʒ̆iti ağani
ketabi tkvanişen molamişinit: “Margaluri Dovigurat”. Muk̆o gverdoni ren aya noçalişe
tkvani? Muk̆o dersi gežin ketabi tkvanis? K̆arta dersis
muk̆o noʒ̆ile gežin? Namu noʒilepek ʒ̆opxupan k̆arta dersi?
Natia Poniava: Ketabi çkimi 255 gverdoni ren. Ketabis eçidovit dersi koren. K̆arta dersis jur didi noʒ̆ile miğunan: Maartani noʒ̆iles grameri do grameriş p̆rakt̆iği mažirenan. Amus majurani noʒ̆ile noqups temat̆uri
zit̆apeten: Mesela, ocaği do ham temat̆uri gurubişa na amulun
zit̆ape − nana, baba do aşo. Amuşk̆ule temat̆uri zit̆apeten ok̆odgineri t̆ekst̆i vana dialogi mulun,
bazi dersis t̆ekst̆iti do dialogiti miğunan. K̆arta dersis, temat̆uri zit̆ape na ixmarinen,
lersepe do notkvamepeti koren, nenaşi msk̆vanoba daa k̆ai na možirapanşeni. Ketabis, doloxe muşi na vixmarit zit̆apet̆en
ok̆odgineri, Margalur- Kortuli do Kortul-Margaluri
nenapunati numʒxun. Ketabişi audio versioniti pxazirit. Audio oxaziruşeni Okorturaşi maartani t̆elevizionik, devlet t̆elevizionik xuci momçes. Manişa ketabişi audio versioni aya t̆elevizionişi
vebbut̆k̆asti (www.1tv.ge) kogidven do tkvati megaqucinenan.
Ali İhsan Aksamazi: Ağani k̆ult̆uruli
noçaliçepe giğunani? Pukironi ambarepe giğunani çkinda?
Natia Poniava: Kartveluri nenapeşi doguroni ketabepeşi gamaçkumu ist̆orik̆osi do gamamçkumale “Art̆anucişi” tigemçane Buba K̆udavaşi idea t̆u. ʒ̆oxle “Margaluri Dovigurat” coxoni ketabi çkimi gamaxtu. Aʒ̆i “Lazuri Dovigurat” ketabişeni viçalişep do “Margaluri Dovigurat” ketabişi mk̆ule do k̆olai versionişi onç̆aruti minonan
berepe şeni.
Ali İhsan Aksamazi: Natia xanumi, ma dido
şukuri goğodapt aya int̆erviu şeni. Tkvan
otkvaluşi çkva nena giğunan na, mu iqven, entepeti miʒ̆vit! Ğormotik p̆anda
goxelan!
Natia Poniava: Ali begi, mati didi mardi giʒ̆umert msk̆va
int̆erviuşeni! İnt̆erviuepe tkvani p̆anda
vik̆itxup. Dido msk̆va dulya ikipt, oint̆eresoni k̆oçepe
moçinapapt do amuşeni didi mardi! Moro, otkvaluşi komiğun − şuri do guriten minon, nena çkini va gondinas,
çkinti artik̆arti va govondinat. Vimedam, çkin Okorturas do tkvan Turkies aya dido beciti dulya maxvenenan. Tkvati Ğormotik goxelan do gegxvaman! Gonç̆eleri Lazona do Lazepe çkimis dido selami vuncğonup. Guri k̆aiten vižirat!
https://sonhaber.ch/natia-poniava-biz-gurcistanda-siz-turkiyede-dilimizi-yasatalim-bunu-yapabiliriz/
http://circassiancenter.com/tr/biz-gurcistanda-siz-turkiyede-dilimizi-yasatalim-bunu-yapabiliriz/
