“Çkini nenaşi coxo
ognuti va unonan!”
(Goʒ̆otkvala: Andğaneri sumari çkimi ren İuri
Ğvincilia. İuri Ğvincilia ren Gurcistanişi gamantanerepeşi art- arti. Ma eya
xut- anşi ʒ̆anaşen doni viçinop. İnt̆ernet̆işi gzaten Kortuli do Margaluri
nenapeten ç̆andinaps do Margaluri, Lazuri do Svanuri nenapes ofiʒialuri
st̆at̆usi aqvas yado şur do guriten ixandeps. Margaluri, Lazuri do Svanuri
nenapeşi dudoçvaloba şeni manebrape muşi k̆ala artot çkvadoçkva akt̆iuroba do
mit̆ingepe ʒ̆opxups Gurcistanis. Eşo miçkin ma. İuri Ğvincilia
ren "ʒent̆r K̆olxida"-şi dudmaxvance. İuri Ğvincilia k̆ala
Lazuri int̆erviu dop̆i. Margaluri, Lazuri do Svanuri nenapeşi oş ʒ̆ana ʒ̆oxleni
do aʒ̆ineri xalişen bğarğalit. Ali ihsan Aksamazi)
+
Ali İhsan
Aksamazi: İuri begi, ʒ̆oxle biyografi tkvanişen molamişinit do eşo gevoç̆k̆at,
iqveni? Sonuri ret? So do mundes yeçkindit? Namu nʒ̆opulape so igurit? Aʒ̆i so
skidut? Mu dulya ikipt? Namu nenape giçkinan?
İuri Ğvincilia: Xela do
k̆aobate! Çkimi biyografiya dido int̆eresoni va iqven. Ma Margali vore. Çkini
dobadona ren Margalona. Ma Zugdidari vore. Margaluri nena k̆ai komiçkin. Başka
nenapeti komiçkin. Mara Margaluri ren nena çkini.
Ali İhsan Aksamazi: Tkvan "ʒent̆r
K̆olxida"-şi dudmaxvance ret. Eşo miçkin. "ʒent̆r
K̆olxida" so, mundes do muşeni geidginu? Edo andğaneri ndğas muperi
akt̆iuroba ikips "ʒent̆r K̆olxida"-k Gurcistanis?
İuri Ğvincilia: 2005 ʒ̆anas, 15
ʒ̆ana ʒ̆oxle, organizaʒia “K̆olxida”-şi regist̆raʒia voxvenapi
Okorturas. Çkini iptineri mizani rt̆u Evrop̆aşi Regionaluri Nenapeşi Kart̆iaşi
rat̆ifik̆aʒia Okorturas. Majura mizani rt̆u Margaluri, Lazuri,
Şonuri nenaşi regionaluri nenaş st̆at̆usi Okorturas. Masuma mizani
rt̆u çkini Margalonaşi, Lazik̆aşi, K̆olxidaşi ist̆oriaşi p̆rop̆aganda. Aya sum
mizani rt̆u. Emoras Okorturaşi şovenist̆uri ideologia dido menceloni rt̆u.
Emuşeni mitik çkini dulyas mxuci va meçu, va memişveles. Ek̆ule, xut
ʒ̆anaşk̆ule aya organizaʒia, “K̆olxida” umanceli doskidu do
geink̆ilu. Edo aʒ̆i aya organizaʒia, “K̆olxida” va ren.
Ali İhsan Aksamazi: 1920- 1930-oni ʒ̆anapeşi
Sovyeturi oxenʒales, Svanuri nenas k̆ult̆uruli aut̆onomia uğut̆ui, va uğut̆ui,
eya va miçkin ma. Mara tkvanti k̆aixeşa giçkinan, 1920-1930-oni ʒ̆anapes,
Sovyeturi oxenʒaleşi dobadonari Margalepesti, Lazepesti k̆ult̆uruli
aut̆onomia kuğut̆es. Margaluri do Lazuri gazetepe gamiçkvinu Sovyet-
Gurcistanis: "Qazaqişi Gazeti", "Mç̆ita murunʒxi" do
majurape. Artneri orapes, Lazuri nʒ̆opulapeti guinʒ̆k̆u Apxazetis. Sovyeturi
xeʒalak ʒ̆oxle Margaluri do Lazuri k̆ult̆uruli aut̆onomias numxvacu uk̆uleti
entepeşi k̆ult̆uruli aut̆onomiaşi gzalepe dudişen k̆udelişa
genk̆ilu. Muşeni amk̆ata xilafi dulyape qu Sovyeturi xeʒalak? Artneri Sovyeturi
xeʒalak Apxazuri, Ç̆erk̆esuli, K̆abardeyuli, Ç̆eç̆eneri, İnguşuri, Osuri,
Abazuri nenapeşi k̆ult̆uruli avt̆onomias eşo vana aşo numxvacu Sovyeturi
dobadonas. Tkvanti giçkinan, 1920- 1930-oni ʒ̆anapes, Margaluri
nenati, Apxazuri, Ç̆erk̆esuli, K̆abardeyuli, Ç̆eç̆eneri, İnguşuri,
Osuri, Abazuri nenapeti artneri xalis rt̆es. Namolagişinit orapes muşeni p̆aradoksaluri
dulyape ixvenu Sovyeturi dobadonas? Tkvan mu izmont?
İuri Ğvincilia: Mara mu ren
çkini p̆roblema?! Mcveşi ist̆oria miçkinan, va miçkinan, aya va ren p̆roblema.
Andğa mu p̆roblemi miğunan? ʒ̆oxleni ist̆oriaşen ambai komiğunan. Aya p̆roblema
va ren. 1930-oni ʒ̆anapeşi ist̆oria komiçkinan. K̆ult̆uruli aut̆onomia do
Sovyeturi administ̆raʒia rt̆u, çkvadoçkva mutxani rt̆u, gazetepe rt̆u. Mara aya
ren mcveşi ambaepe. Aʒ̆i çkin mutu va miğunan. Aya ren çkini aʒ̆ineri
p̆roblema.
Ali İhsan Aksamazi: Aʒ̆i, tkvanti
ginonanna, Margaluri, Lazuri do Svanuri nenapeşi andğaneri ndğalepeşa
komoptat! Margaluri, Lazuri do Svanuri nenapeşi Gurcistanis
andğaneri xalişa komoptat, iqveni? Andğaneri ndğas, Gurcistanis uqonun Apxazi,
Osi, Suryani, Azerbaycanişi Turki, Somexi dobadonarepeti. Edo
andğaneri ndğas Osuri, Apxazuri, Somxuri, Azerbaycanişi Turkuli, Suryanuri
nenapes, eşo vana aşo, k̆ult̆uruli aut̆onomia kuğunan Gurcistanis. Kortuli
oxenʒalek numxvacups Osuri, Apxazuri, Somxuri, Azerbaycanişi Turkuli, Suryanuri
nenapeten nʒ̆opulape, gazetepe, oxenʒaleşi t̆elevizyonişen ç̆andinas. Mtini
giʒ̆vatna, Kortuli oxenʒalek finansuro numxvacups Osuri, Apxazuri, Somxuri,
Azerbaycanişi Turkuli, Suryanuri nenapes. Ma aşo miçkin. Margaluri, Lazuri do
Svanuri nenapes ar k̆ap̆ik̆iti va meçaps Kortuli oxenʒalek. Artneri Kortuli
oxenʒalek Margaluri, Lazuri do Svanuri nenape va žirops; Margaluri,
Lazuri do Svanuri nenape nena vardo, Kortuli nenaşi
dialekt̆epe şinops do emuşeni. Aya ren 1940-oni ʒ̆anapeşi
K̆remlinişen genomskide ofiʒialuri gagnapa. Andğaneri ndğas K̆remlinisti va
uğun eya mcveşi ofiʒialuri gagnapa muşi. Aya dulyaşen tkvan muepe izmont?
İuri Ğvincilia: Mara gazeta ren
mcveşi dulya. Gazeta ren mcveşi nosiş k̆oçepeşi dulya. Aya ağani va ren. Gazeta
va ren modernuli dulya. Gazeta berepeş dulya va ren. Gazeta va ren
moxva andğaneri berepeşa. Berepeşa moxva dulya va ren gazeta. Ağani birapa,
ağani melodi, ağani inst̆rumenti, ağani t̆ekst̆epe ren moxva andğaneri
berepeşa. K̆ino, video ren moxva berepeşa. Andğa aya ren nenaş dulya.
Ali İhsan Aksamazi: Andğaneri ndğas
Kortuli oxenʒalek Margaluri, Lazuri do Svanuri nenape nena va şinops mara
Gurcistanişi dudmaxvance Salome Zurabişvilik Margaluri do Svanuri nenape şeni
mskva ambai komeçu. Mk̆uleşa eşo dotku: "Margaluri do Svanuri nenapes
mxuci mepçatminonan nʒ̆opulapes." Ar- jur tuta ʒ̆oxle Gurcistanişi
dudmaxvancek aşo dotku. Aya ren pukironi ambai. Tkvan aya ambaişen mu izmont?
İuri Ğvincilia: Andğaneri ndğas
mu ren çkini p̆roblema?! Salome Zurabişvilik mu zop̆ons, majura k̆oçik mu
zop̆ons, aya xaraxura ren. Hele ar voʒ̆k̆edat do bžirat, akoni k̆anonis mu
noç̆ars, Okorturaşi Meclisişi k̆anonis mu noç̆ars: Karveluri Nena. Eşo noç̆ars.
Kartveluri nena mu ren?! Mis uçkin, ar pk̆itxat çki.
Salome Zurabişvilik, Saak̆aşvilik, Gamsaxurdiak mu zop̆ons, eya va minon
ma. Okorturaşi k̆anoni Lazepes p̆k̆itxat mu ren Kartveluri nena. Lazuri nena
Kartveluri reni? Lazuri nena va ren Kartveluri nena. Margaluri nena va ren
Kartveluri nena. Emuşeni Okorturas va unonan nena çkini. Okorturas
çkini nenaşi coxoti va unonan. Xvala çkini nena var, çkini nenaşi coxo ognuti
va unonan. Nena çkinişi renoba va unonan. Aya ren p̆roblema. Majura p̆roblemi
ren didi p̆roblemi. Coxo çkini, coxo çkini ognuti va unonan
Okorturas. Coxo çkini rt̆as, eyati va unonan. Emuşeni coxo çkini doktires,
Kartveli geodves. Çkini nena doktires, Kartveluri nena geodves. Lazişi coxo
mejiles, Margalişi coxo mejiles. Kartveli konaç̆ares. Lazuri nenaşi coxo
mejiles, Margaluri nenaşi coxo mejiles. Kartveluri nena konaç̆ares. Margali
akt̆ivist̆epes çkar p̆rot̆est̆i va uğunan.
Lazi akt̆ivist̆epes çkar p̆rot̆est̆i va uğunan. Ma xvala
ar k̆oçi vore. Ma mi vore? Menceli va miğun. Ma xvala- xvala mu maxvenen? Andğa
Okorturas nena çkinişi coxo doktires, coxo çkini doktires. Margaluri, Lazuri
dialekt̆i reni, vareni, aya disk̆usişi mutu va ren. Çkini coxo va
miğunan. Berepek nam nena igurapan sk̆olas, Okorturas? Nam
nena?! Kartveluri nena igurapan. Berepek Margaluri nena
igurapani sk̆olas? İuridilo, p̆olit̆ik̆uro Okorturas Lazuri nena va
ren, Margaluri nena va ren. Şonuri nena Şonepek žiran. Ma Şoni va vore. Ma
Margali vore. Çkini p̆roblema aya ren: P̆rot̆est̆i va miğunan. Emuşeni ma
p̆k̆itxa Lazi akt̆ivist̆epes mu unonan. Margal akt̆ivist̆epes mu unonan, aya
komiçkin ma: Ç̆umanişi Margalepe renan, limcişi Kartvelepe renan. Limcişi
Kartveli renan. Ç̆umanişi Margali renan. Çkimi k̆ala Margali ren. Kortuepe
k̆ala Kartveli renan. Jur guroni k̆oçis k̆ai dulya va aqven.
Ali İhsan Aksamazi: İuri begi, çkva
k̆itxala va miğun. Tkvanti ginonanna, aya int̆erviu voçodinat. Mara
mak̆itxalepe çkini şeni mesajepe giğunanna, eti miʒ̆vit, mu iqven. Ma tkvan
şukuri goğodapt. Pimpili dixaşa!
İuri Ğvincilia: Xvala ç̆arapate nena
va skidun. İst̆anbolis ç̆areli ʒ̆ingepete Lazuri nena va skidun. Lazuri nena va
skidun İst̆anbolis. Lazonas kort̆as Lazuri k̆ult̆uruli ʒent̆ri. Eşo skidun
Lazuri nena. Eşo skidun Lazuri nena Lazonas. Çkini k̆alati aya dulya eşo ren.
Margaluri nena va skidun Tiflisis. Margaluri nena skidun Margalonas.
Akt̆ivist̆epe renan Margalonas, Tiflisis renan akt̆ivist̆epe. Mara nena çkini
ğurun. Muşen ğurun nena? Ham dulyaş k̆oçepes va uçkinan mu unonan. Nena
skidasi? Berepes p̆k̆itxat. Çki artikarti k̆ala didi p̆rofesori voret, miçkinan
mu rt̆asunon. Mara mutu va ren. Margaluri, Lazuri artot dulya va ren, Margalur-
Lazuri int̆ernet̆- radio va ren. Margalur- Lazuri int̆ernet̆-
t̆elevizyoni va ren, mutu va ren. Xvala aşo- işo mulunan-
ulunan, xvala oç̆k̆omaleş dulya. Çki oç̆k̆omaleş cumaloba
va minonan. Çkin minonan artot dulya, Margaluri- Lazurişi artot dulya minonan.
Andğaneri zamanis Margalur- Lazuri t̆elevizyoni va rt̆aşi, mutu va yeçkindun.
Nenati ğurun, k̆oçiti ğurun, ist̆oria ğurun. Çkini ç̆arati va skidun. Aya
ren çkini p̆roblema. 2012 ʒ̆anas ma İst̆anbolis vort̆i do Lazi akt̆ivist̆epe
kobžiri. Lazi akt̆ivist̆epe Lazonas kobžiri. Mara Margalur- Lazuri int̆ernet̆-
t̆elevizyoni şeni mitik mxuci va momçu. Emuşeni andğaneri ndğas çkin mutu va
miğunan. Edo ar ʒ̆ana do gverdi ren, ma mutu dulya va vikip. Aʒ̆i nenaşi
akt̆ivist̆oba va miğun, mutu dulya va miğun aya speros.
Mtel Okorturas, mtel Turkiyes, mtel Lazonas, xvala ma
kovort̆i, xvala-xvala ma kovort̆i. Edo Lazuri nenaşi ofiʒialuri st̆at̆usi şeni
xvala-xvala ma dop̆i p̆rot̆est̆oşi akʒia. Emk̆ata p̆rot̆est̆i komiğut̆u.
Regionaluri nenaş st̆at̆usişi akʒia ma miğut̆u, xvala- xvala arteri k̆oçi
vort̆i ma. Lazuri nenaşi ofiʒialuri st̆at̆usi va uğunan Lazepes Turkiyes.
Çkini k̆ala, Okorturas renan jur k̆at̆egoria, jur
grup̆a Margali akt̆ivist̆epe. Aleksandre Ç̆aç̆ia ren Rusyaşi ajandari k̆oçi.
Muşi organizaʒia ren “Možraoba Samegrelo”. Majura grup̆a ren Tiflisiş
Margalepe. Margaluri nenaş st̆at̆usi şeni varti artis varti majuras uğun
p̆olit̆ik̆uri p̆rot̆est̆i. Margaluri nenaş st̆at̆usi şeni p̆olit̆ik̆uri akʒia
va uğun juristi.
Aya ptkvaminon ma: Mcveşi ist̆orias, 1930-oni
ʒ̆anapes, İskender ʒ̆itaşi, İsak̆i Jvania dido p̆at̆riot̆i k̆oçepe rt̆es. Mara
aʒ̆i am k̆oçepeşi mutu simbolo va miğunan. Mara tkvani k̆ala İskender
ʒ̆itaşi kuğun didi coxo. Tkvani k̆ala, Lazepe k̆ala İskender ʒ̆itaşi ren didi
coxoni k̆oçi. Mara çkini k̆ala, Okorturas, şovenist̆uri ideologiaşi menceliten
İsak̆i Jvania ren sep̆arat̆ist̆i k̆oçi. K̆ai k̆oçi va ren. Eşo işinenan. Dido
k̆oçepes aşo uçkinan. Emuşeni İskender ʒ̆itaşi do İsak̆i Jvaniaş ar simbolo, ar resive, nena çkunişi simbolo rt̆asi k̆ai iqvet̆u.
Si k̆itxi, ma bğarğala. Ma mu bğarğala?! Andğa- ç̆umente nena çkini ğurun.
Xvala ç̆arapate nena va skidun. K̆ai gurite vižirat!
https://sonhaber.ch/iuri-gvincilia-ile-soylesi-dilimizin-adini-duymak-bile-istemiyorlar/
