İrişen Mçire Lazuri- Kortuli Zit̆apuna Kogamaxtu

 

İrişen Mçire Lazuri- Kortuli Zit̆apuna Kogamaxtu

 

İrişen mçire iptineri Lazuri- Kortuli zit̆apuna gamiçkvinu Gurcistanişi nananoğa Tiflisis: “Lazuri Leksik̆oni”. Filologi do magamantane Ali Tandilavaşi noçalişe kogamaxtu  “Gamaçkvale Saari”-şen.  Zit̆apunas 22.590 zit̆a gežin. Ali Tandilavak aya zit̆apeten cumlepeti meçaps. Aya zit̆apuna xvala Ali Tandilavak nadok̆orobu zit̆apeten var, Gurcistanişi Sovyet-Sosyalist̆uri Cumhuriyeti do Apxazetişi Muxtaruli Sovyet-Sosyalist̆uri Cumhuriyetis gamiçkvineri folk̆lorul- etnografiuri namtini ketabepe do dersişi ketabepeşen nok̆orobe zit̆apetenti xazireli ren. Ali Tandilavak aya noçalişe oxazirus kogeoç̆k̆eren mamgurobaşi ʒ̆anapes. Zit̆apunaşi edit̆orepe renan p̆rofesor Merab Çuxua, p̆rofesor Natela Kutelia, p̆rofesor Lile Tandilava do p̆rofesor Lali Ezugbaia.

            Ali Tandilava dibadu Batumişi oblast̆işa mek̆ireli Lazuri oput̆e Sarpis, 1913 ʒ̆anas. Emoraneri Batumişi oblast̆i geladgit̆u ʒarobaşi Rusetişi dixapeşi k̆ele.  Tiflis- St̆alinişi Oxenʒaleşi Universit̆et̆işi Yulva K̆afk̆asuri Nenapeşi Fak̆ult̆et̆işen dimezunu 1941 ʒ̆anas. 1942 ʒ̆anaşen diçalişu Kortuli Nena do Mç̆aralobaşi mamgurapalo do uk̆ule direkt̆oro Sarpişi nʒ̆opulas.  1973 ʒ̆anas tek̆audi iqu. Ali Tandilava domiğures1985 ʒ̆anas; oput̆e muşis dixvinu.

            Çkin Ali Tandilava viçinopt majura noçalişe muşişenti. Ali Tandilavak Muhammed Vanilişi k̆ala artot “Lazeti” coxoni ketabiti doxaziru. Aya ketabi Kortulo gamiçkvinu 1964 ʒ̆anas nananoğa Tiflisis. Aya ketabi omk̆ulanero Xayri Xayrioğlişi Turkuli tercume do  “Lazepeşi Tarixi” coxoten gamiçkvinu 1992 ʒ̆anas, noğa İst̆anbolis.

aksamaz@gmail.com

 

 

https://sonhaber.ch/kapsamli-lazca-gurcuce-sozluk-yayinlandi/

http://www.gurcuhaber.com/2021/11/20/kapsamli-lazca-gurcuce-sozluk-yayinlandi/

http://www.circassiancenter.com/tr/kapsamli-lazca-gurcuce-sozluk-yayinlandi/