“Skidala xvala para do oç̆k̆omale va ren!”
(Goʒ̆otkvala: Aʒ̆ineri musafiri/ sumari çkimi ren Giga Kavtaraže. Giga Kavtaraže ren Gurcistanişi gamantanerepeşen. Dido k̆itxeri do dulyamxvenu k̆oçi ren. Eşo miçkin man. Margaluri nena oskedinu şeni şur do guriten içalişeps. Margaluri lersepe ç̆arups. Margaluri t̆ekst̆epe ç̆arups. Majura nenapeşen Margaluri nenaşa tercumepe ikips. Margaluri videope xazirops. İnt̆ernet̆işen Margaluri dersepe oguraps. Margaluri nena oskedinu do odidanu şeniti manebrape muşi k̆ala artot ʒoʒialuri akt̆ivoba ikips. Giga Kavtaražes gamiçkvineri ar leksiş ketabiti kuğun:
“ʒaşi xolos”. Çkin biografi muşişen, k̆ult̆uruli noçalişepe muşişen, ketabi muşişen do ağani p̆rojepe muşişen molapşinit aya Lazuri int̆ervius. Ali İhsan Aksamazi.
13 I 2021)
+
Ali ihsan Aksamazi: Giga Begi, ipti biografi tkvanişen molamişinit do eşo gevoç̆k̆at, iqveni?! So yeçkindit? Sonuri ret? Namu nʒ̆opulepes igurit? Aʒ̆i mu dulya ikipt? So skidut? Çileri reti? Berepe giqounani? Kortuli do Margaluri nenapeşen çkva namu majura nenape giçkinan?
Giga Kavtaraže: Xela do k̆aoba tkvani! İpti, didi mardi giʒ̆omert, çkimi k̆ala int̆erviuşi int̆eresişeni. Ma ar Zugdiduri k̆oçi vore, hek vitoşi do çxoroşi do otxoneçi do aşi ʒ̆anas (1986), maovroni (8) tutas, otxo Mariaşinas yepçkindidoren oput̆e çkimis Axalsopeli (mcve Margaluri coxo muşi „Opaçxapu“) giožin. Noğa Zugdidis, jur çkvadoçkva nʒ̆opulape dovoçodinişk̆ule, T̆iplisis „Uça Zuğaşi İnt̆ernasionaluri Universit̆eşi“ ar humanit̆aruli pak̆ult̆es, Amerik̆anist̆oba viguri. haʒ̆i T̆iplisis pskidur do hak ar locist̆ik̆uri k̆omp̆anias viçalişam. Çileri kovore do çili çkimiti Samargaloşi ar mskva
do dido mcve noğaşen, Mart̆vilişen ren. Bere haʒ̆i va miqonuman, mara ham iazis pçumert bereti. Kortuli do Margaluri nenapeşen çkva İngilizuri miçkin, Rusuliti eşo- aşo komiçkin, Lazuriti dido k̆ai var, mara xoloti komiçkin ia bzop̆on do ç̆it̆a Turkuliti vognam do masinapen mʒika.
Ali ihsan Aksamazi: Komiçkin, Margaluri nena oskedinu şeni şur do guriten içalişept. Lazuri nenaşi oskiduşati toli giğunan, komiçkin. Namu nena bğarğalapt na, eya çkini nena ren. Namu nenaten k̆ont̆akt̆i vikipt na, eya çkini nena ren. Turkuli bğarğalapt na, Turkuli ren çkini nena. Kortuli bğarğalapt na, Kortuli ren çkini nena. Rusuli bğarğalapt na, Rusuli ren çkini nena. Namu nena bğarğalapt na, eya çkini nena ren. bekiti xilafi
bzop̆on, ma mu miçkin! Mara man aşo miçkin do aşo giʒ̆umert. Tkvan mu isimadept? Maeçani oşʒ̆anura rt̆u k̆oçinobaşi irişen mʒ̆k̆upi oşʒ̆anura. Aʒ̆i ren eçi do maartani oşʒ̆anura. Mara xoloti maeçani oşʒ̆anurak mʒika mskva do mʒika ʒ̆ori vana dido xilafi do dido p̆at̆i xalepeten gza moʒ̆irapan. Lazuri, Margaluri, Svanuri nenapes oskiduşi şansi aqvasunonani aya oşʒ̆anuras? Tkvan mu isimadept? Ç̆it̆a- ç̆it̆a molamişinit, mu iqven!
Giga Kavtaraže: Margaluri do Lazuri nenapes skidalaşi p̆roblemi na uğunan şeni, şuri do guri maç̆ven. Ham çkimi didi pikrişi (msiponişi) dulya ren. Tkva mtini zop̆ont, nam nenaten visinapamt, him nenaşi doloxe pskidurt him oras do him nenaşi k̆ult̆urasti artikartişk̆ala eşo voskedinamt. Nenape xvala ğarğaliten skidun. Duniaşi doloxe p̆at̆i nena va ren, k̆atta nena mskva
do vrosi ren do nena ğuraşi, mutxa didi tariğiti emuşk̆ala ğurun. Ham k̆oçişi gurişi ç̆vini muşeni ren? Himuşen-ki nena k̆oçişi minoba ren şeni, him si mi re, mu re, sonuri re do mu tariği giğun, mu cici giğun, ožirams do mundes ham gondunun, minoba skaniti gondunun. Ham mitis va unon guri do şuri muşis.
Ko, maeçani oşʒ̆anura k̆oçinobaşeni dido mʒ̆k̆upi rt̆u, mara xoloti ʒ̆oriti do mskva mutxanepeti kort̆u him oras. Hamus, ipti, çkuni nenapeşen doptkumert-na, hemindoras k̆ai matkvenan. maeçani oşʒ̆anuras ağnemordalepes met̆i k̆ont̆akt̆i kuğut̆es, baba do nanaşi nenapeten imordet̆es, Margaluri do Lazuri, andğanerişen daha k̆ai isinapamt̆es. Gazetepe gamiçkvinet̆u ham nenapeten do k̆oçepek ik̆itxapamt̆es. Haʒ̆iti gamovaçkumt ham gazetepes, svarapes do jurnalepes, mara ağnepe do çkva didi k̆oçepeti va ik̆itxaman dido. K̆oçepe berepe nişi k̆ala didi noğapeşa uluran, hek skiduran do uk̆açxe oput̆epeşa va goiktenan. Handğa eçdomaartani oşʒ̆anura eşo ren, dunias urbanist̆uli svape dido dido irden do oput̆epes miti va skidun. Mitişa eşo va gatkven, oput̆e skanis skidi do nena skani şinaxi, oç̆k̆omale skani hek ç̆k̆omi ia. K̆atta k̆oçis daha k̆ai ek̆onomik̆uri skidala unon do noğaşati hemuşeni ulun. Ham p̆at̆i va ren, mara p̆at̆i heia ren, didi noğas nenaşi oskedinuşi daha didi p̆roblemi na iven. Didi noğas çkva didi nenapeten isinapaman do para ham nenaten morgaman; Lazuri do Margaluri nenapek hentepes para do oç̆k̆omale va meçams. K̆oçis ora va dubağun, bere muşis nena muşi oguras do guri muşisti dido va unon: ma haʒ̆i ar noğuri k̆oçi vore, hak k̆ai pskidur do bere çkimi ham nena mot unon, aksent̆i uğut̆as do gežiʒuşi ivas, mot minon, daha k̆ai iven, goç̆k̆ondinas, var uçkit̆as ham nena ia zop̆ons. İnt̆ernet̆işi ora ren do k̆oçepes çkva int̆eresi uğunan handğa. Mara xoloti ji na ptkvi-steri, skidala xvala para do oç̆k̆omale va ren, mi re do sonuri re, şuri skanik na ç̆vini megçams goiç̆k̆ondinu-na him oras do hamus na meagnaps k̆oçi, uk̆ule içalişams nena muşi şeni. Ham p̆at̆i mutxanepe na ptkvi ham oşʒ̆anuraşen, dido k̆ai mutxapeti kitkven. ham int̆ernet̆iten nenaşi oskedinuşeni vrosi dulyape maxenenan.
Ham dido gunže p̆ç̆ari do aşo dovoçodinam - Lazuri, Margaluri, Svanuri nenapes oskiduşi şansi aqvasunonan, xvala şuri do guri çkunis unon-na hemindoras; mundes k̆oçis nena muşis qorops, him digurams nena muşis do beresti ogurams. Haşo nenape skidasunon; va qorops na, gondunun nena muşi do minoba muşiti eşo.
Ali İhsan Aksamazi: K̆ult̆uruli noçalişepe tkvanişen ambai komiğun man. Margaluri nena oskedinu şeni ç̆eşididoç̆eşidi k̆ult̆uruli dulyape ikipt. int̆ernet̆işen Margaluri dersepe meçapt. Margaluri lersepe ç̆arupt. İnt̆erviupe meçapt.
Ʒoʒialuri akt̆ivitepe ikipt. Mu çkva dulyape ikipt Margaluri nena şeni? Namu noçalişepes cumu giğunan? Ağani k̆ult̆uruli p̆rojepe giğunani? Bekiti ʒ̆oxleşen ambai meçamu ginonan!
Giga Kavtaraže: Margaluri nenaşeni ma na dulyape vikip, mʒika on. Hentepe nenaşi oskedinuşi gzas ç̆ut̆a ren do çkar mutus va dubağun, ma vimsipon do minon, çkva didi mutxapeti dop̆a, mara aʒ̆işakis, na maxenu dulyape ham on na tkvit steri: İnt̆ernet̆iten nenaşi doguramu na unonan k̆oçepes, video-dersepes mepçam, mara ham p̆ropesionaluri mutxa va ren, xvala ma na maxenen do miçkin steri vikip, mʒika- mʒika. Lersepesti p̆ç̆arupt̆i, mara aʒ̆i him ç̆ut̆a mevt̆k̆oçidoren steri mutxa matkven, iaraticuli k̆rizisi miğun beki da, ma şak̆a bzop̆on. Çkva mu giʒ̆vat, ar çkimi manebrak̆ala Margaluri jurnali na gamavaçkvamt do „Skani“ na giožin şeni viçalişap, mak̆alepe p̆ç̆arup do eşo; hemus t̆eknik̆uri redaksionisti voğodam. Tercumepe vuxenap duniaşi dido çinoberi manç̆aralepeşi novelapes, noç̆arepes do aşo xolo. Ham jurnali „Skani“ xvala Margaluri nenaten gamiçkvinen. Himus gamoçkums „Margaluri Nenaşi Derneği“ do ham Asosiasioniş gemdginalepeşen arteği ma vore manebra çkimi, Givi G. Karçava k̆ala. Ham asosiasionişi do Margaluri jurnalişi, pinansuri do çkva dido vorsoni ambarepes Givi ikips do miti var memişvelaman çkva. Ham ç̆ut̆a p̆roblemi koren, pinansepe ham k̆oronaşi oras dido va ren, kogiçkinan do eşo va rt̆as na, xoloti ar k̆oçis pinansuri ambarepe xvala var axenen, aşo vareni.
Xoloti ar Margaluri p̆odk̆ast̆i vikip, dido ora var on. Margaluri nenaten çkuni p̆roblemepeşen vğarğalap do uk̆ule int̆ernet̆is gebdumer iutubis, Spotify-is, Google Podcasts-is, Apple Podcasts-is do aşo çkva do çkva mʒika mutxanepes vikip nenaşeni...
Ali İhsan Aksamazi: Gamiçkvineri ar ketabi giğunan. Eşo miçkin ma. Bekiti ar va ren! Lersişi ketabi giğunan, eşo miçkin:
“ʒaşi xolos”. Aʒ̆iti aya ketabi tkvanişen molamişinit, mu iqven! Mundes gamiçkvinu aya ketabi tkvani? Namu gamamçkumalaşen gamaxtu noçalişe tkvani? Muk̆o lersi gežin ketabis? Tişen k̆udelişa Margaluri reni, Kortuli vana çkva nenapeşen lersepeti giğunani ketabişi doloxe? Didopeten namu temapeten ç̆arupt lersepe tkvani? Namu şairepe ren tkvani rolmodeli?
Ç̆it̆a- ç̆it̆a molamişinit, mu iqven!
Giga Kavtaraže: Lersepe çkimişi kitabi „Xolos ʒaʒ̆k̆uma“ („ʒaşi xolos“) na giožin „Margaluri Nenaşi Asosiasionik“ kagamaçku. Çkva kitabi, xvala çkimi lersepeşi na t̆as, va miğun. Aia lersepeşi svara, goʒ̆o, juri vitoşi do eçi (2020)
ʒ̆anas gamiçkvinu do Mariaşinaşi tutas, çkimi yeçkinuşi ndğas, manebra çkimik, Givik hedie moğodu. Ma va miçkit̆u ham svaraşi gamaçkvinuşi ambari do dido vixeli, toli çkimiten, çkimi lersepeşi svara na bžiri; hamuşeni Givis mardi buʒ̆omer xolo. Ham svaras oşi do jurneçi do vitişen (150) daha lersepe ko gežin do tişen k̆udelişa xvala Margaluri renan entepe. Didopeten Margaluri nenaşi tema ren, himuşi oskedinuşi p̆roblemişi do ç̆vinişi temaşen ren, ia matkven; xolo duniaşi do k̆oçinobaşi iri ndğaluri skidalaşi ambarepe ren; k̆oçişi şurişi do gurişi ç̆vinepe do xelapeşi temati koren do aşo. Rolmodeli nam şairepe ren, aşo k̆onk̆ret̆uli va matkven. Haʒ̆i dido k̆ai va maʒ̆onen çkimi lersepe, mara entepes mtelis p̆qorop xoloti, xvala himuşeni-ki şuri do guri çkimiten p̆ç̆arupt̆i; na p̆ç̆arupt̆i oras, mu msiponi miğut̆u, him gomaşinen şeni.
Ali İhsan Aksamazi: Ağani ketabiş p̆rojepe giğunani? Pukironi ambepe giğunani çkinda?! Ginonan na, ç̆it̆a-ç̆it̆a molamişinit, mu iqven!
Giga Kavtaraže: Ji na ptkvi steri, muşeni va miçkin do haʒ̆i lersepe va maç̆aren; beki da, uk̆ule domaç̆aras do gamavoçkva. Margaluri nenas dido mskva do dido int̆eresoni lersimç̆aru (p̆oet̆i) k̆oçepe kouqonun. Ham nenaten dido vrosi lersepe komiğunan, mara haʒ̆i nena çkunis p̆rozauli noç̆arepe dvaç̆irs; romanepe, novelape do aşo t̆ekst̆epe minonan Margaluri nenaten. Nena xvala lersepeten va irden. Vitişakis ç̆ut̆a-ç̆ut̆a novelape komiğun do xolo çkva ç̆ut̆a vana didi novelape domaç̆aras na, ar p̆rozaşi svara çkimiti gamavoçkvare; mara ham mundes iven, va matkven mutu. Boʒ̆k̆edat.
Ali İhsan Aksamazi: Giga Begi, şukuri goğodapt. ak̆onari domibağun do çkva k̆itxala va miğun tkvanda. Mara otkvaluşi çkva nena giğunan na, entepeşenti molamişinit, mu iqven! Ğormotik iroras goxelan! pimpili dixaşa!
Giga Kavtaraže: Manti didi mardi giʒ̆vat minon xoloti ham int̆eresoni k̆itxvapeşen. Dulya tkvani dido momʒ̆ons, ora- ora çkva do çkva int̆eresoni tkvani xeneri int̆erviupe vik̆itxam do moxelams, mskva Lazuri t̆ekst̆epe na voʒ̆k̆er. Ğormotik nenape çkuni, Lazuri do Margaluri oskedinas ʒa do mzuğasteri, k̆oçinoba ham p̆lanet̆as (çkva p̆lanet̆apesti ivas na, hekti) skidasşakis! Nena çkuni va ğurasen! ʒaşa yextit do irdas tkvani mskva
dulyape!
http://gurcuhaber.com/2021/01/16/giga-kavtaradze-hayat-yalnizca-para-ve-yemek-degil/
http://circassiancenter.com/tr/hayat-yalnizca-para-ve-yemek-degil-soylesi-turkce-lazca/
