“Çkin mzaxalepe komiqonunan Gurcistanis”
(Goʒ̆otkvala: Andğaneri musafiri çkimi ren Mehmet
Ender Savcini. Mehmet Ender Savcini ren k̆itxeri-ğnoseri ‘Gurci’/ ‘Çveneburi’
gamantanerepeşen. Andğaneri Lazi gamantanerepes va uçkinan; Mehmet
Ender Savciniti, Lutfi Baysali steri ren Lazepeşi dost̆epeşen arteri. Edo Lazi
gamantanerepes numxvacu emuk. ‘LazepeşiTarixi’ coxoni ketabişi gamaçkvinus
numxvacu do tercumani Hayri Hayrioğli Malaqmaže do gamamçkvala “Ant”işi
şkas k̆ap̆et̆i xinci iqveren. Oşkaruli manebrapeti komiqonut̆es: Yamaxoğli
Yuksel Yilmazi, Tufan Şafak Yuksel Lominaže do majurape. Mehmet Ender Savcini
k̆ala biyografi muşişen do k̆ult̆uruli noçalişepe muşişen bğarğali na. Edo aya
t̆ekst̆i ren çkini int̆erviuşi. Ali İhsan Aksamazi)
+
Ali İhsan Aksamazi: ʒ̆oxle biyografi tkvanişen molapşinat do eşo
gevoç̆k̆at, iqveni?! So do mundes yeçkindit? Namu nʒ̆opulapes igurit? Mu
mesleği giğunan? Çileri reti? Berepe giqonunani? Motape
giqonunani? Andğaneri ndğas so skidut? Namu nenape giçkinan?
Ti-tkvanişen molamişinit, mu iqven!
Mehmet Ender Savcini: Ma yepçkindi 1952 ʒ̆anas. Noğa İst̆anboli-
Beşiktaşis dovibadi ma. Kadirgaşi geç̆k̆apuroni nʒ̆opulas do majurani
k̆lasişakisti, Gedikpaşaşi oşkenoni nʒ̆opulas doviguri ma. Çileri vore. Bere va
miqonun ma. T̆ek̆avudi vore. Turkuli nena do Gurculi nena komiçkin.
Ali İhsan Aksamazi: Tkvan mohacir Çveneburepeşen reti? Varna svalyari
Gurcepeşen reti? Gurculo mu gvari giğunan? Mzaxalepe giqonunani
Gurcistanis?
Mehmet Ender Savcini: Baba çkimişi nana, nandidi çkimi, ren Sapancuri
Gurcepeşen. Alosmanişi Sarayişa dibargeren emindroneri nananoğa İst̆anbolis.
P̆ap̆u çkimişi baba t̆eren k̆uşçibaşi Alosmanişi Sarayis. P̆ap̆u
çkimik nandidi çkimi k̆ala Alosmanişi Sariyişen içileren. Edo Beşiktaşişi
mahalle Abbasağaşa dibargeren. P̆ap̆u çkimişi cincişen tişen k̆udelişa ambai va
miğun (Sarayişi xalk̆işen ren emuşeniti Alosmanişi Sarayişi arkivepes
goşogoruşi vore). Nanaşen nandidi çkimi ren Batumişen mohaciri moxtimerişi
k̆ulani. Noğa Duzceşi Çilimlişa dibargeren. Nana çkimişi babati ren
Bulgaristanişen mohaciri. Entepeti Duzceşa dibargerenan. Nana çkimişi nanaşi
gvari ren Gorgoşaže. Çkin mzaxalepe komiqonunan Gurcistanis.
Ali İhsan Aksamazi: Ahmet Ozkan Melaşvili, Hayri Hayrioğli Malaqmaže do
Akin Şanveri içinopt̆iti? Entepe k̆ala mundes ok̆oiçinit?
Mehmet Ender Savcini: Ahmet Ozkani do Hayri Hayrioğli viçinopt̆i ma.
1976 ʒ̆ana rt̆u, emorapes entepe k̆ala ok̆oviçini ma.
Ali İhsan Aksamazi: 1968 ʒ̆anas, noğa İst̆anbolis gamiçkvineri
‘Gurcustani’ coxoni ketabi ipti mundes žirit do mundes ik̆itxit?
Mehmet Ender Savcini: Noğa Bursaşa mepteret̆i, Ahmet Ozkani
mok̆itxuşa mepteret̆i, emindros eya ketabi maqu.
Ali İhsan Aksamazi: ‘Jurnali Çveneburi’ muşeni ʒ̆oxle Turkiyes
vardo, İsveçis gamiçkvinu? ‘Jurnali Çveneburi’ muşeni ʒ̆oxle İsveçis uk̆uleti
noğa İst̆anbolis gamiçkvinu? Mcveşi ‘Jurnali Çveneburi’ k̆ala mundes
ok̆oiçinit? Eya jurnalis maddur- manevuri mxuci meçiti?
Mehmet Ender Savcini: Jurnali İsvecis gamiçkvinet̆u, emoras var; uk̆ule,
jurnali gamiçkvinet̆u noğa İst̆anbolis, emoras ‘Jurnali Çveneburi’
k̆ala ok̆oviçini ma. Jurnalişi abone vort̆i, eşotenti madduri mxuci mepçapt̆i
mati.
Ali İhsan Aksamazi: Goʒ̆os Xalvaşi P̆ridonişi ‘Omri’/
‘Skidala’ coxoni ketabi do Saba Artvinelişi ketabi gamiçkvinu. Aya ketabepe
ik̆itxiti? Muepe gatkvenan aya ketabepe şeni?
Mehmet Ender Savcini: Ho, vik̆itxi.
Ali İhsan Aksamazi: ‘Gurcustani’ coxoni ketabi va ren Ahmet Ozkan
Melaşvilişi noçalişeya, Mosk̆ovas Fransuli nenaten gamiçkvineri ar ketabişi
tercume renya tkumernan namtinepek. Eşo itkven. Tkvan mu gatkvenan aya ambai
şeni?
Mehmet Ender Savcini: Aya dulyaşen ambai va miğun ma.
Ali İhsan Aksamazi: Ahmet Ozkan Melaşvilik Gurculi k̆ult̆uri k̆ala
ibodert̆u, emuşeni va iqvilinuya tkumernan namtinepek Turkiyes. Tkvan mu
gatkvenan aya ambai şeni?
Mehmet Ender Savcini: Va miçkin ma.
Ali İhsan Aksamazi: ‘Jurnali Çveneburi’ gamiçkvinu Ahmet Ozkan
Melaşvilişi ğuraşen 13 ʒ̆anaşk̆ule. Muşeni va gamiçkvinu 13 ʒ̆anas?
Mehmet Ender Savcini: Emoras k̆ont̆akt̆i oxvenu meç̆ireli rt̆u,
finansuri p̆roblemepe kort̆u do emuşeni. Aya endolepeşi guri şeni va
gamiçkvinu. Ma eşo vizmon.
Ali İhsan Aksamazi: ‘Lazepeşi Tarixi’ coxoni ketabi gamiçkvinu
Hayri Hayrioğli Malaqmažeşi tercumeten 1992 ʒ̆anas. Aya ketabişi gamaçkvinus
tkvanti mxuci meçit. Eşo miçkin ma. Aya ambai ʒ̆ori reni?
Mehmet Ender Savcini: Ho, ʒ̆ori.
Ali İhsan Aksamazi: Lazepeşi Tarixişen tkvanti mak̆alepe ç̆arit do antepe
gamiçkvinu ar gazetas; eşo kovogni ma. Namu gazeta rt̆u? Mundes t̆u? Aya
noçalişe tkvanişen çkimda ambai megaçenani?
Mehmet Ender Savcini: İst̆anboli-Bakirkyoyişi emoraşi lok̆aluri
gazetapeşen ‘Yeni Sefas’ (1988 ʒ̆anas) do “Lideris” (1987 ʒ̆anas) gamiçkvinu
mak̆alepe çkimi.
Ali İhsan Aksamazi: Açkva Lazuri, Abxazuri, Çerkesuli, Kurduli, Gurculi,
Zazuri, P̆omak̆uri, Arnavuturi nenapeti menoʒxune dersi ren Turkiyesi
nʒ̆opulapes. Aya ambai şeni mu izmont tkvan?
Mehmet Ender Savcini: K̆ai iqvasion,aşo vizmon ma.
Ali İhsan Aksamazi: Arçkva k̆itxala va miğun tkvanda. Mara otkvaluşi
çkva ambai giğunan na, eti miʒ̆vit, mu iqven! Ma şukuri giʒ̆umert.
Mehmet Ender Savcini: Ma şukuri giʒ̆umert.
https://sonhaber.ch/turkce-lazca-soylesi/
