“Gazeta Noğa tişen
k̆udelişa Lazuri gamaviğit !”
(Goʒ̆otkvala: Andğaneri musafiri çkimi ren Murat̆
K̆aradenizi. Murat̆ K̆aradenizi ʒ̆oxleşen çkimi mamgure rt̆u
İnglisuri nenaşi k̆ursişen; aya rt̆u 2009 ʒ̆anas, aʒ̆i eşo
komşuns. Uk̆ule xolo mamgure domaqu Lazuri nenaşi
k̆ursis, Kadikoy “Aka-der”-is, “Lazuri Mektebi”-s; aya rt̆u 2012 ʒ̆anas.
2010 ʒ̆anaşi İgrik̆a varna Maisi rt̆u; Murat̆ K̆aradeniziti, manti artneri
sinifis mamgure doviqvit, “GK̆M”-s ( Kortuli K̆ulturuli ʒent̆ris/ Gurculi
K̆ult̆uruli Şkaguris); ç̆it̆a- ç̆it̆a Kortuli/ Gurculi nena
vigurapt̆it; Manana Gurgeniže rt̆u çkini mamgurapale. Uk̆uleti
gzamşine domaqu Lazuri nenaşi oskedinuşi gzas; sum ketabi çkimişi
gamaçkvalus şurdoguriten memişvelu t̆eknik̆uri dulyapes. “Lazepe-
Lazuri/ Lazuri Minoba” do “… Lazepe” coxoni ketabepe çkimişi
redaksiyonis, “Lazuri Nenaşi Geç̆k̆apuli Dersepe” coxoni ketabi
çkimişi mizanp̆aji do suretepeşi ožiramus grafik̆er manebra muşişi xeten
memişvelu; çkimi k̆ala int̆erviupe doqu, eya int̆erviupe “Noğa T̆V”-şen gamognapu
Murat̆ K̆aradenizik. 7 Mbulora 2015 ʒ̆anaşi Goşoʒxunas noğa İst̆anbulişi 2-ani
noʒ̆ileşen ti-moşletineri mebusobaşi namzeti
(dep̆ut̆at̆obaşi k̆andidat̆i) vort̆i. “Gazeta Noğa”-şen
k̆andidat̆oba çkimişi ambai gamognapu, mxuci komomçu; xarmaloba çkimişi ambaiti
İsmail Avcı Bucak̆lişi mak̆aleten “Gazeta Noğa”-şen dost̆epes gamognaperen
Murat̆ K̆aradenizik. Amk̆ata mskva cumak̆oçi ren Murat̆ K̆aradenizi. Ti- muşi
udodginu oağanaps, ok̆uleni noxvene muşi ʒ̆oxleni noxvenepe muşişen p̆anda çkva
mskva ren. Ar k̆ele k̆aixeşa iguraps, majura k̆eleti noxvenepe muşiten
majurapes mskvaşa doguraps. Murat̆ K̆aradenizi aşo miçkin ma. Murat̆
K̆aradenizi k̆ala mk̆ule int̆erviu dop̆i ma. Biyografi muşişen do k̆ult̆uruli
noçalişepe muşişen bğarğalit. 18 II 2022/ Ali İhsan Aksamazi)
+
Ali İhsan Aksamazi: ʒ̆oxle
ti-tkvanişen molamişinit, mu iqven! Sonuri ret? So dibadit? Aʒ̆i so skidut?
Namu nʒ̆opulapes so do mundes igurit? Namu nenape giçkinan?
Murat̆ K̆aradenizi: Rize- Atinuri vore.
Atinas dovibadi. İlkmektebi oput̆e çkimis doviguri. Ortamektebi do lise Mp̆olis
doviguri. Mesleğişi lises k̆omp̆iuteri doviguri. Andğaneri ndğas Mp̆olis
pskidur. Doxmeli ar şirk̆etis viçalişep. Lazuri, Kortuli do İnglisuri k̆aixeşa
va mağarğalen mara oxomaʒ̆onen.
Ali İhsan Aksamazi: Ar int̆ernet̆
-gazetaşi edit̆ori ret. “Gazeta Noğa”-şi edit̆ori ret. “Gazeta Noğa” PDF-şi
format̆iten gamiçkvinen int̆ernet̆- mosas. “Noğa”-s Turkuli mu
uʒ̆umenan? “Gazet̆a Noğa” tişen k̆udelişa Lazuri ren. İpti mundes
gamiçkvinu aya gazeta, “Gazeta Noğa”? “Gazeta Noğa”-şi ilkineri
nomera mundes gamiçkvinu? “Gazeta Noğa” muk̆o but̆k̆a gamiçkvinet̆u? Mu
noğiraten “Gazeta Noğa”-şi gzas gedgitit? Didopeten muperi ç̆aralepe
gamiçkvinen “Gazeta Noğa”-s?
Murat̆ K̆aradenizi: Noğa, Turkuli
“kasaba”-s uʒ̆umenan. “Gazeta Noğa” int̆ernet̆is gamaviğit 2014 ʒ̆anas;
didopeten ovro but̆k̆a do tişen k̆udelişa Lazuri rt̆u, eşo pxazirit. Vit
but̆k̆ati gamiçkvinu. Lazuri didopeten oğarğaluşi nena ren, oç̆aruşi
adeti dido va ren. “Gazeta Noğa”-ten Lazuri oç̆arus omxvacu mint̆es.
“Gazeta Noğa” ar tutas ar fara gamaviğit. Tutaşi bazi ambeepe Lazuri
gamaviğit.
Ali İhsan Aksamazi: Tkvan yut̆uberiti ret.
Yut̆ubis jur goçkvaneri but̆k̆a kogiğunan: “Noğa T̆V” do “Lazuri Mjora T̆V”.
“Mjora”-s Turkuli mu uʒ̆umenan? “Noğa T̆V” do “Lazuri Mjora T̆V”-şi
gzas mundes gedgitit? “Noğa T̆V”-s didopeten muperi p̆rogramape gamiçkvinen?
“Lazuri Mjora T̆V”-s didopeten muperi p̆rogramape gamiçkvinen?
Murat̆ K̆aradenizi: “Noğa
T̆V” gomʒ̆k’i 2015 ʒ̆anas; aʒ̆işa sumeneçidojur (62) video
pxaziri do gamaviği. Mjora, Turkuli “guneş”-is uʒ̆umernan. “Lazuri Mjora
T̆V” p̆andemişi oras gomʒ̆k̆i. P̆andemişi gurişeni
didopeten oxoris dodgituşa mecburi vort̆i, xemboşi va dopxedi do “Lazuri
Mjora T̆V” k̆ala viboder. Aya k̆anali, “Lazuri Mjora
T̆V” gomʒ̆k̆i 2020 ʒ̆anaşi ʒ̆anağanis. “Noğa T̆V”-s Lazuri-
Turkuli rep̆ort̆ejepe gamaviğit. “Lazuri Mjora T̆V” ren musik̆aşi
k̆anali. Lazuri- Turkuli birapa do şiirişi videope gamaviğap.
Yut̆ubis dobağine Lazuri videope va rt̆u, aya dork̆inoba kobžiri. Aya dork̆inobaşi
mot̆ivasyoniten “Noğa T̆V” do “Lazuri Mjora T̆V” gomʒ̆k̆i.
Ali İhsan Aksamazi: “Gazeta Noğa”,
“Noğa T̆V” do “Lazuri Mjora T̆V” aʒ̆işa mişi finansuri omxvacuten gamiçkvinu,
gamiçkvinen? Gazeta “Noğa”, “Noğa T̆V” do “Lazuri Mjora T̆V” namu foniten
gamiçkvinu, gamiçkvinen?
Murat̆ K̆aradenizi: “Gazeta Noğa”, “Noğa
T̆V” do “Lazuri Mjora T̆V” şeni çkar mitis finansuri omxvacu va vak̆vandi.
“Gazeta Noğa”, “Noğa T̆V” do “Lazuri Mjora T̆V” ti- çkimişi çkinapa do
finansuri menceliten gamaviği. Berobaşen ar manebra çkimi grafik̆eri rt̆u.
T̆eknik̆uri dulyapes emuk memişvelu.
Ali İhsan Aksamazi: “Gazeta
Noğa”, ar fonişen moxtimeri paraten vagamiçkvinu, xvala çkimi finansuri
menceliten do grafik̆eri manebra çkimişi t̆eknik̆uri meşvelapaten
gamiçkvinu, aya tkumert. “Gazeta Noğa”, amuş gale k̆olmanuri noçalişe rt̆u. Eşo
komiçkin. Gazetaşi mç̆arupe miepe rt̆es? “Gazeta Noğa”-s miepek
emeği meçes?
Murat̆ K̆aradenizi: Ho, çkimi
finansuri menceliten gamiçkvinu “Gazeta Noğa”. Çkar mitis para va vak̆vandi,
mç̆arupe çkinisti para va mepçi. Vildan Lok̆umcik, Muhammed Tunçsanik, Murat̆
K̆aradenizik, Suat Ozyamanik, Murat̆ Mutinaşik, Ali İhsan Aksamazik, İsmail
Bucak̆lişik mak̆alepe mutepeşiten, emeğepe mutepeşiten “Gazeta
Noğa”-s numxvaces.
Ali İhsan Aksamazi: P̆andemişi, k̆oronavirusişi
ndğalepes voret. Amdğalepes muepe ikipt? Ağani ambarepe giğunani? Çkinda
pukironi ambarepe giğunani?
Murat̆ K̆aradenizi: P̆andemişi
ndğapesti “Lazuri Mjora T̆V” şeni videope pxazirop. Aʒ̆işa
oşidootxoneçidovit̆ootxo (194) video pxaziri do gamaviği.
Ali İhsan Aksamazi: Aya int̆erviu şeni
tkvan şukuri goğodapt. Çkva k̆itxala va miğun tkvanda. Aʒ̆i ak̆onari
domibağunan. Mara tkvan otkvaluşi çkva nenape giğunanna, entepe miʒ̆vit, mu
iqven! Pimpili dixaşa!
Murat̆ K̆aradenizi: Aya şansi namomçit
şeni mati şukuri goğodapt.
https://sonhaber.ch/murat-karadeniz-gazete-nogayi-tamamen-lazca-yayinladik/
http://www.circassiancenter.com/tr/murat-karadeniz-ile-soylesi/
