“Şurdoguriten Lazuri
nena şeni naiçalişeps ar şuri doviqvi!”
(Goʒ̆otkvala: Andğaneri musafiri çkimi ren
Gulcan Yuksel Asilyazici. Gulcan Yuksel Asilyazicik Lazuri nenas dido qorops do
oskedinu şeniti şur do guriten içalişeps. Gulcan Yuksel Asilyazici ren “Lazepe”
coxoni feysbuk̆- but̆k̆aşi magedgine do dudedit̆ori. Muşi k̆ala ar
int̆erviu dop̆i. Edo biyografi muşişen do k̆ult̆uruli noçalişepe muşişen
molapşinit. Ali İhsan Aksamazi)
+
Ali İhsan Aksamazi: Gulcan Xanum,
ipti biyografi tkvanişen molamişinit, mu iqven! Sonuri ret. So dibadit?
Miepeşen ret? Namu nʒ̆opulape so igurit? Kimoceri reti? Berepe giqonunani? Mu
dulya ikipt? So skidut? Namu nenape giçkinan?
Gulcan Yuksel Asilyazici:
Xelak̆aoba! Ma Viʒ̆uri vore. 1990 ʒ̆anas noğa Rizinişi şkasguris
dovibadi. Geç̆k̆apuroni nʒ̆opula do liseşi maartani do majurani sinifepe noğa
Rizinis doviguri. Baba çkimik ek içalişept̆u do emuşeni. Baba çkimi tek̆audi
iquşi, noğa Viʒ̆eşa dovibargit. Liseşi çodina sinifi noğa Viʒ̆es doviguri. Edo
Lazepe k̆ala oskidus kogevoç̆k̆i mara ʒ̆k̆arişen gamaxtimeri çxomi steri
vort̆i. Lazepeşi adetepes ek̆onari gegaperi va vort̆i do emuşeni.
ʒ̆oxleşen noğa Rizinişen noğa Viʒ̆eşa mk̆ule ora şeni
bayramişi tadilepes mevulut̆it. Emuşeniti Lazuri adetepeşen mç̆ipaşa ek̆onari
ambari va miğut̆u. Noğa Rizinis vigurapt̆i, nʒ̆opulas k̆ursepe
komiğut̆u vana t̆ekvandoşi k̆ursepe komiğut̆u. Emuşeniti upşu ora va miğut̆u.
Xali eşo iquşiti, noğa Viʒ̆eşa va memalet̆es çkin. Noğa Viʒ̆eşa
dovibargitşi, ipti dido va momʒ̆ondu. Baba çkimişati dido p̆at̆i şumeri
vort̆i. Muşeni noğa Rizinişen noğa Viʒ̆eşa dovibargit mado babas
vubecğupt̆i. Ma mu maçkinet̆uki, aya ç̆it̆a noğaşen ak̆o mskva gonoşinepe
maqvasunt̆u. Minoba çkimi ak yeçkindu. Megerem ma ma va vort̆ere. Coxo muşiten,
minoba muşiten, nena muşiten Lazi vort̆ere! Liseşk̆ule universit̆et̆is va
viguri. Çkvadoçkva dulyapes doviçalişi. Çkvadoçkva dulyape dop̆i. K̆irtasiye
gamaçamuşi dulyas nosi mepçapt̆i ar dukyanis. Nadoviçalişi ek̆onari dulyapeşi
doloxe aya dulya dido k̆ai momʒ̆ondu. Emoras Lazuri ketabepe dido gamapçi.
Lazuri gazeta çkini Ağani “murunʒxi”-ti gamapçi gazeteşi reyonis; dido ʒ̆anape
ʒ̆oxle rt̆u, gazetaşi reyonişi mç̆ita k̆ordeloni gonʒ̆kimapati andğaneri steri
k̆aixeşa komşuns ma. Dukyanişa namulut̆u mamgurepes menoʒxune Lazuri dersişa
toli giğut̆an mado ambai mepçapt̆i. Noğa Viʒ̆es menoʒxune Lazuri dersi şeniti
udodginu mamgurepe dop̆k̆oroberet̆i. Şurdoguriten Lazuri nena şeni naiçalişeps
ar şuri doviqvi. ʒ̆oxleşen sum- otxo cumleten Lazuri naağarğalet̆u Gulcanis
andğaneri ndğas şkvit k̆it̆aloni şiiri aç̆aru. Namiçkit̆upe maç̆aru ma. Uk̆ule
universit̆et̆işi imtianişa kamapti, eşo k̆arari komepçi. İmtiani şk̆ule noğa
Samsunis ‘Mzgudaluri do Skindinuri Omralobaşi burmeşi Organuli Xaçkaşi
P̆rogramis’ gurapaşi hak̆i maqu. Universit̆et̆is navort̆i oraşi
doloxe ardido Lazuri video-k̆lip̆i dop̆i. Ardido şiiri dop̆ç̆ari. Lazuri nenas
dido p̆qoropt̆i. Nʒ̆opula şk̆ule Viʒ̆es ‘Xalk̆i Gurapaşi Şkaguris
Bambu Xenʒ̆k̆eli oxvenus’ usta mamgurapale doviqvi; dersepe komepçi. Dido
keifoni orape rt̆u. 2018 ʒ̆anas dovikimoci do açkva noğa Artvinişi çodina ilçes
pskidur ma.
Ali İhsan Aksamazi: Gulcan Xanum,
dido ʒ̆anapeşen doni, Lazuri nena oskedinu şeni gur do şuriten içalipt.
“Lazepe” coxoni feysbok̆-but̆k̆aşi magedgine do dudedit̆ori ret. Armʒika aya
but̆k̆aşen, “Lazepe”-şen molamişinit, mu iqven! Mundes geidginu “Lazepe”? Mu
peri reaksiyonepe mekçapan mak̆itxalepe tkvanik?
Gulcan Yuksel Asilyazici: “Lazepe” coxoni
feysbok̆-but̆k̆a 2012 ʒ̆anas gomʒ̆k̆i. Nadoviguri çkinapa majura k̆oçepesti
oguru mint̆u. Lazuri minobaşi çk̆ua majura k̆oçepesti oguru şeni gomʒ̆k̆i aya
feysbok̆-but̆k̆a.Amk̆ata noğira komiğut̆u ma. Tkvanti eya içinopt,
ma aya gzas tarixiş mamgurapale Ergun Konakçi k̆ala gebdgiti. Majura edit̆orepe
k̆alati doviçalişi. Rametli Osman Ozeliti entepeşen arteri ren. Feysbok̆-but̆k̆a
çkini andğaşakis rametli Osman Ozelişi emeğik komuğu. Allahik şuri uçxonas! Eya
do muşi emeği çkar va gomoç̆k̆undun.
Ali İhsan Aksamazi: Gulcan Xanum,
tkvanti k̆aixeşa giçkinan, ʒ̆oxleşen Lazuri nena umanceli rt̆u. Mara açkva eşo
va ren. Açkva Lazuri nena umanceli va ren. Mteli Lazi gamantanerepek xe
ok̆ok̆limeri var, Lazuri nena oskedinu şeni xvala- xvala şur do guriten
içalişepan. Tkvan mu izmont, Lazuri nena ma-21 oşʒ̆anurasti skidasunoni? 37
ʒ̆anaşen doni, elek̆t̆rik̆- faturapeten k̆arta oşi liraşi jur lira TRT̆-s xarci
mepçapt. TRT̆-k Lazuri armʒika ç̆andinaps. Mara ‘TRT̆- Lazuri’ va ren. ‘TRT̆-
Çerkesuliti’ va ren, ‘TRT̆-Abazuriti’ va ren. Mu p̆at do ‘TRT̆- Lazuriti’
yeçkindas? Tkvan mu izmont?
Gulcan Yuksel Asilyazici: Ma mk̆itxat na, aya
k̆itxalaşi coğap̆i doloxe muşis şinaxeri kuğun: “Mteli Lazi gamantanerepek xe
ok̆ok̆limeri var, Lazuri nena oskedinu şeni xvala- xvala şur do guriten
içalişepan.” K̆arta k̆oçis xvala- xvala mutxanepe oxvenuşa toli kuğun, gonepti
emuşeni sersi çkini k̆aixeşa va ignapinen. Mati ʒ̆oxleşen aya xalişen dido
molapşini mara mitik quci va momçu. Çkva muepe maxvenenan, ma va miçkin.
Ali İhsan Aksamazi: Tkvan Lazuri
şiirepeti, mak̆alepeti ç̆arupt, eşo miçkin. Lazuri ketabi tkvani mundes
gamiçkvinasunon?
Gulcan Yuksel Asilyazici: Mtini giʒ̆vat
na, 2014 ʒ̆anas gamiçkvineri ar ketabi komiğun ma: “Goşağeri Mskva
Tkvalape”; Lazik̆a Gamaçkvalaşi K̆olekt̆ifişen kogamaxtu. Qoropeli
but̆k̆a- adminepe Ergun Konakçi, Şaziye Selvi Turan, Osman Ozel do Besim Ozelik
ma p̆anda memişveles feysbok̆-but̆k̆a “Lazepes”. Mtini giʒ̆vat na, mati aya
ketabi çkimiten, but̆k̆a- adminepeşi emeğepe şeni entepes uğureli oçukare
meçamu mint̆u. Noğira çkimi eya rt̆u. Feysbok̆-but̆k̆a çkini
“Lazepes” nagežin xutoşidootxo Lazuri tkvala do tercumepeşen ar cebiş ketabi yeçkindu.
Armʒika mani- mani ixazirinu aya ketabi çkimi. Namoxtasen
oras, ketabi çkimi tişen k̆udelişa onʒ̆uranuten xolo gamoçku k̆ai
iqven, eşo vizmon ma. Amuş gale şiirepe, birapaş t̆ekst̆epe do anek̆dot̆iş
nok̆orobepeti komiğun. Oğarğalu çkimi ek̆onari mskva varentina,
xeşen namomixteps k̆onariten Lazurişi oskidus
gurdoşuriten mevumxvacup ma. Ar ndğas mati uğureli noxvene
memaşkvasen, eşo vicer ma.
Ali İhsan Aksamazi: Gulcan Xanum, ma
dido şukuri goğodapt. Çkva k̆itxala va miğun. Mara tkvan otkvaluşi çkva nenape
vana mesajepe giğunanna, mu iqven, entepeti, miʒ̆vit. Allahik ocaği tkvani
k̆ala p̆anda goxelan!
Gulcan Yuksel Asilyazici: Bask̆uri dido mskva
ar tkvala koren. Aya tkvala dido k̆ai maʒ̆onen: “Ar nena, mʒika k̆oçik
nağarğalaps şeni var, eya nenaşi mancepek eya navağarğalapan şeni ğurun!”
Nana do baba çkimik çkini k̆ala Lazuri va ğarğalapt̆es emuşeniti minobaşi
ç̆k̆ua yano maqu. Aʒ̆i nana- babapes ar- jur nena vuʒ̆vare: Mu iqven, berepe
tkvani k̆ala Lazuri ğarğalit! Lazuri va ğarğalatna, tkvan ğuraten, çkin
bğuraten!
Ma tkvan şukuri goğodapt
https://sonhaber.ch/dort-elle-lazca-icin-savasan-biri-olup-ciktim/
http://circassiancenter.com/tr/dort-elle-lazca-icin-savasan-biri-olup-ciktim/
