ali ihsan aksamaz: 8. დინანა

8. დინანა

- - არნდღას კლარაში დინანათი ოხორიშა მუსაфირი ქომეხთუ. ეშო ქომშუნს აწი. მუჭოში ხანუმი რტუ კლარაში დინანა?

- - დიდო კაი ხანუმი რტუ. დიდშურონი ოხორჯა რტუ. კითხერი დო ჩქინერი ოხორჯა რტუ. ხჩე თომალონი რტუ. ძიცინაჯე ხანუმი რტუ. არ ქეთაბითი ქომომჩუ. ემუქ ოჩუქარე ქომომჩერეტუ.

- -ქეთაბი მუჭოში რტუ? მუ ამბარეფე მეჩაფტუ ოჩუქარე ქეთაბი მუშიქ?

- - ქეთაბიქ არ ოფუტე დო ოფუტეში ხალკიში სქიდალაშენ ამბარეფე მეჩაფტუ. ბუნჯინა, ნცა, დიხა დო სქინდინაფეშენ ამბარეფე მეჩაფტუ ეჲა ქეთაბიქ. მარა კაიხეშა ოკითხუ ვა მიჩკიტუ მა. დინანაქ ქეთაბიშენ პაშურაფე მიკითხუფტუ უდოგინუ.

- - ოჩუქარე ქეთაბი კაი გაწონუ, ჰოი?!

- -ჰო, ქეთაბი დიდო კაი მაწონუ. ონჭელონი ქეთაბი რტუ. მარა პაპული ჩქიმი, პეტერი, დინანა, ნოღა მაჲენфელდი, ოფუტე დორфლი, ფაცხა ჩქინი, ოფუტეში სქიდალა გომაშინუ მა ეჲა ქეთაბითენ. ედო ენთეფეში ხასრეტიშა აჩქვა ვა მემახონდინეტუ მა. გურის მემოდგითუ ხასრეტი. დოფხედი დო უდოდგინუ შიკინერი- შიკინერი ვიმგარი მა. იგბალი გოქთერი მიღუტუ. კურბეთის ხვალა- ხვალა ვორტი მა. უმითელი ვორტი აჲა დიდი ქვაში ოხორის. ყინი რტუ. გრილონი რტუ. თოლეფე უთეელი დოფსქიდი.

- -ოფუტეშენ უმუთელი დო უმითელი რტი დო ემუშენი!

- - ჰო, ოფუტეშა ხასრეტი დოლომიძიტუ გურის. იროთე ოფუტეშა გზა ბგორუფტი. გურის მგარინი მომიხთეფტუ. მარა თესელლი ქომიღუტუ. კლარა დო დინანა მუში, სანესტიანი დო ფამბუღი კალა ვორტი. ამციქა გური მიხვენეტუ კლარაში ნანდიდიქთი. გური ჩიჩქუ ქომიღუტუ მა.

- - ბარემ ქეთაბი კაიხეშა იკითხიი, დინანაქ სი გოკითხაფიი?

- - არ фარა ვარ, ოში фარა ვიკითხით დო ვოკითხაფი ეჲა კეთაბი მა. დინანაქ არკელე ქეთაბი მიკითხუფტუ, მაჟურა კელეთი ალბონი ჭიტა- ჭიტა მოგურაფტუ. იროთე უდოდინუ ჩქიმი ხალითენთი დერდი ზდიფტუ ზავალი დინანაქ.

- -კლარაში დინანათი კაი გურონი რტერენ! ოკითხუ კაიხეშა გაგურუი სი?

- - გაგურუი მუ თქვალა რენ?! მორო მუ, მა მაგურუ მათქვენ. წკარი სთერი ვა რტუ, მარა ჭიტა- ჭიტა მიჩქიტუ. ჭიტა- ჭიტა მაკითხეტუ. ოკაჩხეთი კანდიდატი ბეგიშენთი დოვიგური მა.

- - კანდიდატი ბეგი მი რტუ?! მუ დულჲა იქიფტუ ემ კოჩიქ ოხორის?

- -ემინდრონერი ხამფა ოჯაღეფეს დოხმელი მამგურაფალეფე ქუყოუნტეს ოხორის, ბერეფე მუთეფეში ოკითხაფუ შენი. ბურჟუვაფეში ბერეფეს ემკათა ადეთი ქუღუტეს. კანდიდატი ბეგი, კლარაში დოხმელი მამგურაფალე რტუ. ემუქ დოხმელი დერსეფე მეჩაფტუ კლარას ოხორის.

- -მამგურაფალე კანდიდატი ბეგი მუჭოში კოჩი რტუ?

- -დიდო ჩქინერკოჩი რტუ კანდიდატი ბეგი. დიდო ზაიфი რტუ. უჩა თოლონი რტუ. თომა ვა უღუტუ თის. თიპეტკელერი რტუ. ფიმფილი დო ოშუმეშითი ვა უღუტუ. ოфიდითი ვა უღუტუ. დიდო გინძე ჩხვინდი დო ჟურ დიდო დიდი ყუჯი ქუღუტუ კოჩის. მუჭო კაპკაპი ეშო რტუ. ოშქურინონი ნუნკუ ქუღუტუ. იროთე ღვინიმშუმუ სთერი რტუ. მარა დიდო მსქვა სერსი ქუღუტუ.

- -მუკო წანერი რტუ ემ მამგურაფალე?

- - ვა მაჩქინუ, ვა ოხომაწონუ მა. პაპული ჩქიმიშენ ბადი იძირეტუ. ეშო მათქვენ.

- - კაი გურონი რტუი კანდიდატი ბეგი?

- - ჩქინერკოჩი რტუ, მარა თი- მოწონდერი რტუ. ემუქ ჭიტა მშინაფტუ, მუნდიხომულა მშინაფტუ. როტენმაჲერ ხანუმიში კუდელი რტუ. ჩქიმდენ დიდო ინკრახი ქუღუტუ ემუს. კანდიდატი ბეგის ყუჯიქთი კაი ვა უგნაფტუ. თოლიქ კაი ვა უძიროფტუ. ჩორჩი კოჩი რტუ. პალალო რტუ. როტენმაჲერ ხანუმიში ნენათენ გულუტუ იროთე.

- -მუეფე გოგურაფტუ კანდიდატი ბეგიქ?

- -ალამანური ნენაში გრამერიში კაიდეფე მოგურაფტუ ემუქ. დიდი დო ჭიტა ბონჯეფე, ნოქთა, ვირგული დო ენთეფეში სვა დო ბეჯითობა მოგურაფტუ კანდიდატი ბეგიქ.

- -ჩქვა მუ გოგურაფტუ კანდიდატი ბეგიქ?

- -კანდიდატი ბეგიქ კაიხეშა ლათინური ნენა ქუჩქიტუ. ხესაპი უჩქიტუ. ლათინური ნენაში გრამერი მოგურაფტუ. ხესაპი მოგურაფტუ ემუქ. სურეთიში დერსი ქომიღუტეს. მუსიკიში დერსი ქომიღუტეს. ოხორონუში დერსითი ქორტუ. ოხორონუთი დოვიგური მა. ჩქინ ბირაფაფე ვიბირტით მელე- მოლე. დესტანეფე ფთქუმერტით ჩქინ ლოყაშა.

- - წკარი სთერი იგურაფტი სი! ნამუ ბირაფაფე იბირტით?

- - ალამანური, იტალჲანური, Фრანსული ბირაფაფე ვიგურაფტით დო ვიბირტით ლოყაშა. ოპერაფა ვიბირტით. ხალკური ბირაფაფე ვიბირტით ჩქინ. დიდო ხამფა მუსიკიში რეპერტუარი მაყუ.

- -დიდო ხამფა მუსიკიში რეპერტუარი ყაყუ. დიდო კაი! მუსიკიში ნოტა დო სოლфეჟითი გაგურესი?

- -ჰო, ნოტათი, სოლфეჟითი დოვიგურით. კანდიდატი ბეგიქ ეჲათი ჩქინ დომოგურეს.

- -კლარას მუსიკალური ინსტრუმენტი უღუტუი?

- -ჰო, ქუღუტუ. პიანა ქუღუტუ დო მსქვაშა გელაჩაფტუ.

- -კანდიდატი ბეგიქ მუ ინსტუმენტი გელაჩაფტუ?

- -Фლუტი გელაჩაფტუ ემუქ.

- - სი მუ ინსტრუმენტი გელაჩაფტი?

- - მა პილილიშა თოლი ქომიღუტუ. ფეტერიშენ პილილიშა გეგაფერი ვორტი.

- - მარა კანდიდატი ბეგის პილილი ვა უღუტუ. იფთი фლუტი მუში ქომომჩუ. ედო მა фლუტი გელაფჩაფტი. ფეტერიში პილილიშენ არმციქა გელაჩამუ დოვიგურერეტი დო ემუშენი.

- - ფეტერის ნოტა დო სოლфეჟი ვა უჩქიტუ! ეშო ვა რენი?!

- -ჰო, ფეტერის ნოტაშენ დო სოლфეჟიშენ ჩქარ ამბარი ვა უღუტუ, მარა ლოყაშა გელაჩაფტუ. კანდიდატი ბეგიქ ნოტათენ გელაჩამუ დომოგურუ.

- - Фლუტი გელაჩამუ კაიხეშა გაგურუი?

- ჰო, მჭიფაშაში დოვიგური მა.

- - ოკითხუ დო ოჭარუ დობაღინე გაგურუი? ლათინური ნენაში გრამერი დო ხესაპი გაგურუი სი?

- - ჰო, ოკითხუ- ოჭარუ დობაღინე დოვიგური მა. ლათინური გრამერითი, ხესაპითი დოვიგური, დომაგურუ.

- - კანდიდატი ბეგიშენ ლათინური ნენა დო ხესაპი მჭიფაშაში გაგურუი სი?

- - მთელი ხოლო ვარ, მჭიფაშაში ვარ, მარა ჭიტა- ჭიტა დოვიგური.

- - სი კაი მამგურე რტი. კანდიდატი ბეგის აღანი ხალი სქანი კაი აწონუი?

- - მორო მუ, კანდიდატი ბეგის აღანი ხალი ჩქიმი კაი აწონუ დო ოკაჩხე მუნდიხომულა ჩქარ ვა მშინუ. აღანი ხალი ჩქიმი ქოძირუ დო ემუშკულე მა ჩქარ ჭიტა ვა მშინუ. იროთე მსქვა ნენაფე მიწუ დო აჩქვა ჩქიმდენ ჩქარ ინკრახი ქუღუტუ კანდიდატი ბეგის. ონჯღორე აყუ კოჩის. ემუქ მა დომოსაღუ. უგურაფობაშენ მა მომიშლეთინუ კანდიდატი ბეგიქ. ედო ვიზენგინი. სერი-დღალერი მბოში ვა დობდგითი დო აღანი ამბარეფე დოვიგური მა. გურაფათენ ლაი კვინჩი დოვიყვი დო უდოდგინუ ვფუთხი მა. ლაი შქვით ნცაშ ჟინ ვორტი გურაფაში მენჯელითენ.

- -კანდიდატი ბეგიქ მეგიშველერენ. კანდიდატი ბეგიქ მწკუფიშენ კაპინერი მოგიშლეთინერენ. მეგერემ კაი კოჩი ტერენ. დიდშურონი ტერენ. ნამუსონი ტერენ. აწი მა გემზული ქოდოფსქიდი. ედო ონჯღორე მაყუ მა. ასთერი კოჩი დიდო ვა იძირენ აჲა დუნჲას.

- -ჰო, კანდიდატი ბეგიქ ჩქინაფა დო კულტური მუშითენ მოზენგინუ. აჩქვა კართა დულჲას ოთხო თოლითენ ვოწკერტი მა. აჩქვა ხაზირი ვორტი ჯაჰილობა მერგაფუშა. ჭარა მიჩქიტუ მა. ჰუქმი მახვენეტუ აჩქვა.

- - ჩქვა მიეფექ მეგიშველუ ოკითხუ- ოჭარუ- ოსურეთუს?

- - ოკითხუ- ოჭარუ- ოსურეთუს კლარაქთი, დინანაქთი, საბესტიანიქთი იროთე მემიშველუ.

- - სქანი აღანი ხალითენ კლარა დო დინანაქთი იხელესი?

- -მორო მუ, იხელეს.

- - როტენმაჲერ ხანუმიქთი იხელუი სქანი გეჯგინობათენ?

- - ვარ, ემუქ ჩქარ ვა იხელუ. გეჯგინობა ჩქიმი აკისკანეტუ. არ ნენათენ სი ხესაპი ყვი! მა ჭიჭიტა ბერე ვორე, როტენმაჲერ ხანუმი რენ კოჯა ოხორჯა!

- - მუშენი ეშო იქიფტუ როტენმაჲერ ხანუმიქ?

- - Фუკარეფე პატი აწონეტუ ოხორჯას. ბერეფე კაი ვა აწონეტუ როტენმაჲერ ხანუმის.

- -ონჭელონი ოხორჯა ტერენ! ჰემითი ნოსი მღირი უღუტერენ როტენმაჲერ ხანუმის.

- - ოხოშირშოლერი დულჲაფე ქუღუტუ ემუს.

- -ყოროფა დო ვიჯდანი ვა უღუტერენ ოხორჯას!

- - ხამფა კოჩიშა ტოლი ვა უღუტუ. ფარა დო ხამფობაშა თოლი ქუღუტუ ოხორჯას. თოლუძგუ რტუ.

- -როტენმაჲერ ხანუმიქ სი გბახუფტუი?

- - ვარ, ვა მბახუფტუ. ემკათა ჯეზა ვა რტუ ოხორის. როტენმაჲერ ხანუმიქ იროთე ნენათენ მბახუფტუ. მარა აჩქვა დუდი ჩქიმი გორდინუში გზას ვორტი მა. უდოდგინუ კართა სფეროშენ ვიგურაფტი მა.